Ankara, 6 noyabr, AZƏRTAC

Noyabrın 5-də Türkiyənin Ərzurum şəhərində Azərbaycanın 44 günlük Vətən Müharibəsində Zəfərin dördüncü ildönümünə həsr olunmuş təntənəli tədbir keçirilib.

AZƏRTAC xəbər verir ki, Atatürk Universitetində keçirilən tədbirin iştirakçıları Qarabağ müharibələri şəhidlərinin xatirəsini ehtiramla yad ediblər.

Azərbaycanın tarixi qələbəsi mövzusunda sənədli film nümayiş etdirilib.

Universitetin rektoru, professor Ahmet Hacımüftüoğlu bildirib ki, Şuşa şəhərinin işğaldan azad olunma tarixi təkcə Azərbaycan deyil, Türkiyə üçün də əlamətdardır. Atatürk Universiteti iki qardaş ölkə arasında əlaqələrin möhkəmlənməsinə mümkün töhfə verməyə hazırdır.

“Bu gün universitetimizdə yüzlərlə Azərbaycan vətəndaşı təhsil alır, gələcəkdə isə söhbət minlərlə insan haqqında gedə bilər. Biz Azərbaycan tərəfi ilə distant formatda ilkin təlimin təşkili məsələsini müzakirə etməyə hazırıq”, - deyə Hacımüftüoğlu bildirib.

Rektor Türkiyə və Azərbaycan liderlərinin iki qardaş ölkə arasında əlaqələrin dərinləşməsinə verdiyi töhfələrə diqqət yönəldib. “Ankara və Bakının qardaşlığı bütün dünya üçün güclü mesajdır. Biz belə əlamətdar bayram tədbirinin təşkilindən qürur duyuruq”, - deyə o, qeyd edib.

Daha sonra çıxış edən Azərbaycanın Qarsdakı Baş konsulu Nuru Quliyev ölkəmizin formalaşma mərhələləri və üzləşdiyi çətinliklər barədə tədbir iştirakçılarını məlumatlandırıb. O, Prezident, Ali Baş Komandan İlham Əliyevin kursunun uğurlarından, doğma torpaqlarını 30 illik erməni işğalından azad edən Azərbaycan Ordusunun şücaətindən danışıb.

Diplomat vurğulayıb ki, ermənilərdən fərqli olaraq azərbaycanlılar heç vaxt dinc əhaliyə qarşı cinayət törətməyiblər, dinc əhaliyə qarşı humanist rəftar ediblər. Baş konsul nümunə kimi ermənilərin Azərbaycanın Qarabağ bölgəsini könüllü şəkildə tərk etməsini göstərib. Bu zaman Ermənistana gedən yolda bir nəfər də olsun etnik erməni xəsarət almayıb, fakt beynəlxalq təşkilatlar tərəfindən qeydə alınıb.

Nuru Quliyev Azərbaycanın bütün torpaqlarının erməni işğalından azad edilməsindən böyük qürur duyduğunu bildirib.

Baş konsul Naxçıvan Muxtar Respublikası ilə Azərbaycanın şərq rayonları arasında rabitənin bərpası məsələsinə də toxunub. “Bununla da, Azərbaycan və Türkiyə arasında yeni marşrut açılacaq və bu, ölkələrimizin daha da güclənməsinə töhfə verəcək”, - deyə diplomat bildirib.

Azərbaycanın Vətən Müharibəsindəki qələbəsinin bütün Türk dünyası üçün dönüş nöqtəsi olduğunu vurğulayan diplomat əlavə edib ki, bu hadisə Türk dövlətlərinin birliyini, həmrəyliyini və birgə addımlar atmaq əzmini nümayiş etdirib, Azərbaycan və Türkiyəni daha da yaxınlaşdırıb.

Ramin Abdullayev

AZƏRTAC-ın xüsusi müxbiri

Ankara