Əziz Ələkbərli: Türk Dövlətləri Təşkilatı ən böyük mənəvi sərvətimiz və gələcəyimizin qarantıdır - ŞƏRH
Bakı, 8 oktyabr, AZƏRTAC
XXI əsrin siyasi mənzərəsi sürətlə dəyişən proseslər və yeni geosiyasi çağırışlarla səciyyələnir. Bu şəraitdə Türk Dövlətləri Təşkilatı (TDT) təkcə ortaq etnik və mədəni köklərə söykənən birlik deyil, eyni zamanda, siyasi suverenliklərin uzlaşdırıldığı, iqtisadi sinerjinin gücləndirildiyi və təhlükəsizlik sahəsində strateji koordinasiyanın qurulduğu mühüm platforma kimi formalaşır.
Bu fikirləri AZƏRTAC-a açıqlamasında Milli Məclisin deputatı, Qərbi Azərbaycan İcmasının İdarə Heyətinin sədri Əziz Ələkbərli söyləyib.
Deputat qeyd edib ki, qədim və zəngin tarixi ilə seçilən Qəbələnin oktyabrın 6-7-də Türk dünyasının diqqət mərkəzinə çevrilməsi təsadüfi deyil. TDT-nin Zirvə Toplantısı artıq formal protokol görüşü olmaqdan çıxaraq, Türk dünyasının gələcək inkişaf istiqamətlərinin, ortaq strateji hədəflərinin və birgə fəaliyyət mexanizmlərinin müəyyənləşdirildiyi mühüm tarixi mərhələyə çevrilir.
Ə.Ələkbərlinin sözlərinə görə, Xarici İşlər Nazirləri Şurasının iclasından başlayaraq Dövlət Başçılarının əsas toplantısınadək bütün mərhələlər yeni təşəbbüslərin irəli sürülməsi və inteqrasiya istiqamətində mühüm müzakirələr üçün geniş imkanlar yaratdı. Zirvə Görüşünün sonunda sədrliyin Qırğızıstandan Azərbaycana keçməsi ölkəmizin təşkilatdakı liderlik rolunun təsdiqi və yeni dinamik mərhələnin başlanğıcıdır. Bu, Zirvə Görüşünün Bəyannaməsində də əksini tapmaqla, TDT-nin siyasi və institusional inkişafında yeni bir mərhələnin rəsmi təsdiqi kimi dəyərləndirilir.
Deputat bildirib ki, Prezident İlham Əliyevin “Bizim başqa ailəmiz yoxdur, bizim ailəmiz Türk dünyasıdır” bəyanatı Azərbaycanın bu birliyə verdiyi mənəvi və strateji dəyərin ən parlaq ifadəsidir. Dövlətimizin başçısının təşəbbüsləri nəticəsində TDT formal qurumdan real təsir gücünə malik beynəlxalq təşkilata çevrilib. Şuşada keçirilmiş qeyri-rəsmi Zirvə görüşü və qəbul edilmiş Qarabağ Bəyannaməsi Türk dövlətlərinin həm sülh, həm də çətin dövrlərdə bir-birinə dəstək göstərən strateji tərəfdaşlar olduğunu nümayiş etdirib.
Prezident İlham Əliyevin Bişkek və Budapeştdə səsləndirdiyi “XXI əsr Türk dünyasının inkişaf əsri olmalıdır” hədəfi bu birliyin qarşısına qlobal miqyasda tarixi vəzifə qoyur. Azərbaycanın işğaldan azad edilmiş ərazilərində qardaş ölkələrlə birgə həyata keçirilən infrastruktur layihələri bu həmrəyliyin real fəaliyyət müstəvisinə çevrildiyini sübut edir.
Son illərdə Özbəkistanın üzvlüyü, eləcə də Macarıstan, Türkmənistan və Şimali Kipr Türk Cümhuriyyətinin müşahidəçi statusu ilə TDT-nin sürətli genişlənməsi onu ənənəvi regional bloklardan fərqləndirir. Artıq təşkilatın gündəliyində mədəni əməkdaşlıqla yanaşı enerji təhlükəsizliyi, kibermüdafiə, kosmik tədqiqatlar və beynəlxalq ticarət yollarında strateji mövqelər kimi məsələlər də yer alır.
Gələcəkdə birgə hərbi təlimlər, müdafiə sənayesi əməkdaşlığı və strateji informasiya mübadiləsi kimi mexanizmlərin yaradılması Türk dünyasının tarixi irsini müasir güc platformasına çevirməyə imkan verəcək. Bakıda fəaliyyət göstərən TÜRKPA və Türk Mədəniyyəti və İrsi Fondu kimi qurumlar vasitəsilə mədəniyyət, təhsil və informasiya sahəsində əməkdaşlığın genişlənməsi isə TDT-nin təməlini daha da möhkəmləndirir.
Əziz Ələkbərli vurğulayıb ki, Türk Dövlətləri Təşkilatı bu gün siyasi həmrəylik platforması, sabah isə qlobal güc mərkəzidir. Qəbələ Zirvəsi bu baxışın reallaşmasının başlanğıcıdır. XXI əsr şübhəsiz ki, Türk dünyasının inkişaf əsri olacaq.
Bölmənin digər xəbərləri
