“Ferensvaroş”un baş məşqçisi: “Qarabağ”la oyunda çox sadə qollar buraxdıq
Bakı, 20 avqust, AZƏRTAC
İlk hissə yaxşı keçdi, inamlı oynadıq, hətta qol da vurduq.
AZƏRTAC xəbər verir ki, bu sözləri Macarıstanın "Ferensvaroş" klubunun baş məşqçisi Robbi Kin UEFA Çempionlar Liqasının pley-off mərhələsində "Qarabağ"a 1:3 hesabı ilə uduzduqları ilk oyundan sonra keçirilən mətbuat konfransında deyib.
İrlandiyalı mütəxəssis bildirib ki, Bense Etvöşün zədələnməsi komandasını bir qədər geri saldı: "Təəssüf ki, çox sadə qollar buraxdıq. Oyuna daha çox nəzarət etmək istərdik".
R.Kin Bakıda oynanılacaq cavab matçına da toxunub: "Rəqibin artıq qalib gəldiyini düşünməsi bizə ümid verir. Futbolda hər şey ola bilər, bu vəziyyətdən çıxmaq olar".
Qeyd edək ki, komandalar arasında cavab qarşılaşması avqustun 27-də Tofiq Bəhramov adına Respublika Stadionunda keçiriləcək.
Bölmənin digər xəbərləri
