FİFA PREZİDENTİ FUTBOLDA VİDEOTƏKRARLAR MÖVZUSUNA YEKUN VURMUŞDUR
Bakı, 17 dekabr (AZƏRTAC). FİFA-nın prezidenti Yozef Blatter bildirmişdir ki, nə qədər ki, Beynəlxalq Futbol Assosiasiyaları Federasiyasına rəhbərlik edir, futbolda videotəkrarlar tətbiq edilməyəcəkdir. Blatterin sözlərinə görə, görüşü hakimlər idarə etməlidirlər. Bu və ya başqa anı təkrar izləmək üçün görüşü dayandırmaq olmaz.
Y.Blatter belə bir inam ifadə etmişdir ki, gələcəkdə futbolda videotəkrarların tətbiq olunması ideyası müzakirə edilməyəcəkdir.
FİFA-nın rəhbərliyi keçmişdə də dəfələrlə videotəkrarlar ideyasından imtina etmişdir, lakin son vaxtlar görüşlərin idarə olunmasında yeni texnologiyaların tətbiqi mümkünlüyü barədə müzakirələr yenidən başlanmışdır. Buna səbəb 2010-cu il dünya çempionatında iştirak etmək uğrunda Fransa və İrlandiya arasında görüşdə baş vermiş epizod olmuşdur.
Həmin oyunda Fransa futbolçuları qolu yığma komandanın kapitanı Tyerri Anri əllə oynadıqdan sonra vurmuşlar. Hakim qaydanın pozulmasını görməmiş və qolun vurulmasını qeydə almışdır.
Bölmənin digər xəbərləri
