Floridada “Milton” qasırğasının vurduğu zərərin miqyası qiymətləndirilir
Bakı, 11 oktyabr, AZƏRTAC
Florida ştatında azı 16 nəfərin ölümünə səbəb olan “Milton” qasırğasından sonra cümə günü təbii fəlakətin fəsadları aradan qaldırılır. “Reuters” agentliyi xəbər verir ki, bu ştatın Fövqəladə Hallar Xidmətinə yanğınlar, elektrik xətlərinin sıradan çıxması və xəsarət alanlarla bağlı 100-dən çox müraciət daxil olub.
AZƏRTAC xəbər verir ki, “Milton” qasırğası Floridada dəniz suyu səviyyəsinin fəlakətli miqyasda artmasına səbəb olmasa da, ərazilərin təmizlənməsi əməliyyatı həftələr, hətta aylar çəkə bilər. Qasırğa səbəbindən ABŞ-da 3 mindən çox reys təxirə salınıb və ya ləğv edilib. Florida ştatının bəzi yerlərində təcili xidmətlər bir gecədə daxil olan çoxlu sayda zənglər ucbatından bir neçə saatlığına dayandırılıb.
Analitiklərin fikrincə, Atlantik okeanında qeydə alınan ən güclü beşinci qasırğa olan “Milton” təkcə sığortaçılara 100 milyard dollara başa gələ bilər.
Dəymiş zərərin dəqiq miqyası hələ müəyyən edilmədiyi üçün Ağ ev bu ştatın hökumətinə dəstək vəd edib.
Florida sakinləri ikiqat fəlakət yaşadıqlarını deyirlər. Fırtınanın ən dağıdıcı təsirlərindən bəziləri əyalətin şərq sahillərində, 100 mildən çox məsafədə baş verib.
“CBS News” telekanalının Floridanın hüquq-mühafizə orqanlarına istinadla verdiyi məlumata görə, qasırğa nəticəsində azı 16 nəfər ölüb.
“PowerOutage.us”un məlumatına görə, cümə axşamı gecəsi Floridada təxminən 2,75 milyon ev və müəssisə elektriksiz qalıb.
Florida qubernatoru Ron DeSantis cümə axşamı xəbərdarlıq edib ki, ştat ən pis ssenaridən xilas olsa da, dəymiş zərərin miqyası yetərincə böyükdür.
Bölmənin digər xəbərləri
