Forbes: İlon Maskın sərvəti 300 milyard dolları ötüb
Bakı, 2 noyabr, AZƏRTAC
“Tesla” və “SpaceX” kompaniyalarının qurucusu İlon Maskın varidatı 300 milyard dolları keçib.
AZƏRTAC xəbər verir ki, “Forbes” jurnalının “The World`s Real-Time Billionaires” reytinqinə əsasən İlon Maskın varidatı 22,6 milyard dollar (7,72 faiz) artıb və hazırda 315,2 milyard dollar həcmində qiymətləndirilir.
Sahibkarın sərvətinin əsas hissəsini “Tesla” kompaniyasının səhmlərinin 21 faizi təşkil edir. Kompaniyanın özünün kapitallaşması isə oktyabrın sonunda ilk dəfə trilyon dolları ötüb. İlon Mask eyni zamanda 2002-ci ildə əsasını qoyduğu “SpaceX” kompaniyasında miniatür paya malikdir. Bu yaxınlarda investorlar onun dəyərini 74 milyon dollar həcmində qiymətləndirib.
Reytinqin ikinci pilləsində “Amazon” kompaniyasının qurucusu Ceff Bezos qərarlaşıb. Onun varidatı 193 milyard dollar təşkil edir. İlk üçlüyə, həmçinin “Louis Vuitton” və “Dior” kimi brendlərin daxil olduğu zinət əşyaları istehsalçısı LVMH kompaniyasının rəhbəri Bernar Arno daxildir - 190,8 milyard dollar.
Qeyd edək ki, “Forbes” jurnalının milyarderlərin sərvətini izləməyə başladığı 1982-ci ildə Amerikanın ən varlı insanı olan maqnat Deniel Lüdviqin sərvəti 2 milyard dollar və ya “indiki” hesabla təxminən 5,5 milyard dollar idi.
Bölmənin digər xəbərləri
