FRANSA YIĞMASININ FACİƏSİ
...Oyunun 110-cu dəqiqəsində Zidan İtaliya yığmasının müdafiəçisi Marko Materattsi ilə münaqişəyə görə qırmızı vərəqə alır. Görüşü diqqətlə izləyən tamaşaçılar fikir vermişdilər ki, bunadək Materattsi fransalıya nəsə demişdi, bundan sonra Zidan ona kəllə ataraq yerə sərmişdir.
Bəs, həmişə təmkinliyi və alicənablığı ilə fərqlənən Zidanın idmançıya yaraşmayan belə hərəkətinə səbəb nə idi? Axı, o, bunun nə ilə qurtaracağını gözəl bilirdi. Görünür, onun özündən çıxmasının sanballı səbəbi vardı.
Bir ehtimala görə, Materattsi Fransa yığmasının kapitanını ciddi təhqir edərək, onu “terrorçu” adlandırmış və kabil mənşəli olduğunu xatırlatmışdır. Zidanın atası Əlcəzairdə milli azlıq olan kabillərdəndir. Bu xalq ərəblər Məğribi zəbt edənədək onun yerli əhalisi olub. Kabillər ən yeni tarix ərzində, xüsusən Fransanın müstəmləkə rejimi dövründə dəfələrlə təqiblərə məruz qalmışlar. Ötən əsrin 70-ci və 80-ci illərində onların öz hüquqları uğrunda bir sıra çıxışları amansızcasına yatırılmışdır. Kabillər istər Əlcəzairin özündə, istərsə də Fransada özlərini Əlcəzair ərəblərindən bir qədər fərqli aparırlar.
Zinədin üçün ciddi futbol 1989-cu il mayın 25-də Nantda başlamışdır. Zidan o günü belə xatırlayır: “Məni meydana yalnız 15 dəqiqəliyə buraxdılar, özü də Zlatko Vuyoviç və Rudi Krol kimi ustalarla birlikdə. Onda ayağım topa üçcə dəfə dəydi. Sevincdən özümü göyün yeddinci qatında hiss edirdim. Məsələ ondadır ki, cəmi 15 dəqiqədə bunadək ayda qazandığımdan altı dəfə çox qazanmışdım”.
Söz düşmüşkən, Zidan qalib gəlməyi hələ uşaqlıqdan öyrənmişdi. Onun sevimli əyləncələrindən biri sosiska yemək müsabiqəsi idi. Gələcək futbolçu dostları ilə birlikdə sahildə hərdən belə müsabiqə keçirərdi. Dostlar dəniz sahilində istirahətə gələnlərə daha çox sosiska yeməkdə pulla yarışmağı təklif edərdilər. “Müştəri” şirin dilə aldanıb “tora düşdükdə” gözlənilmədən Zidan peyda olardı. Onun da iştahasını söz ola bilməzdi.
Buna baxmayaraq, o, acgözlükdə yox, yaşıl meydanda ulduz oldu. 500-dən çox görüş keçirdi, 95-dən artıq qol vurdu, dörd dəfə dünyanın ən yaxşı futbolçusu adına, 1998, 2001, 2002 və 2003-cü illərdə Avropanın ən yaxşı futbolçusu üçün “Qızıl top”a layiq görüldü, UEFA-nın sorğusuna əsasən, XX əsrin ikinci yarısında Avropanın ən yaxşı futbolçusu hesab edildi. Kann kinofestivalında “Zidan. XXI əsrin portreti” böyük uğurla göstərildi.
Zidan futboldan gedəcəkmi? Nə bilmək olar, bəlkə də, qalacaq. Axı, qəhrəmanlar “döyüş meydanı”ndan məğlub getmirlər. Dünya çempionatı təşkilat komitəsinin prezidenti, əfsanəvi alman futbolçu Frans Bekkenbauer deyir ki, “Zidan kimi oyunçunu Münxenin “Bavariya” klubu istənilən an sevinclə qəbul edər”.
Xatırladaq ki, final oyununda meydançadan çıxarılmasına baxmayaraq, Zidan indiki dünya çempionatının ən yaxşı oyunçusu hesab edilmiş və “Qızıl top” mükafatına layıq görülmüşdür.
(Material “Novosti” agentliyinin və digər mənbələrin xəbərləri əsasında hazırlanmışdır).
Bölmənin digər xəbərləri
