FUTBOL ÜZRƏ DÜNYA BİRİNCİLİYİNİN XATİRƏ ƏŞYALARI MÜNHEN HƏRRACINA ÇIXARILMIŞDIR
Futbol üzrə 2006-cı il dünya birinciliyi təşkilat komitəsinin xeyriyyəçilik məqsədi ilə təşkil etdiyi hərraca yenicə başa çatmış çempionatdan yadigar qalmış 100-dən artıq avadanlıq çıxarılmışdır. Onların qiymətləri çox bahadır. Amma bu, azarkeşləri qorxutmur. Məsələn, Almaniya millisinin baş məşqçisi, çempionat bitdikdən sonra məşqçilik fəaliyyətindən əl çəkmiş Yürqen Klinsmanın forması hərraca çıxarılandan az sonra 620, komandanın 22 yaşlı yarımmüdafiəçisi Bastian Şvaynştayqerin ağ-qırmızı rəngli futbol ayaqqabısı 500, üzərində Frans Bekkenbauerin imzası olan qalstuku 600, üzərində Pele, Eysebio, Mişel Platini, Maradona, Bekkenbauer, Sepp Mayer və onlarca digər əfsanəvi futbol ulduzlarının, o cümlədən Jak Şirak, Gerhard Şröder və digər tanınmış siyasi xadimlərin avtoqrafı olan futbol topunun yeganə nüsxəsi 1500 avroya satılmışdır.
Hərrac davam edir.
Hərracdan əldə edilən gəlirin hamısı yenicə təsis olunmuş Xəstə və Əlillərə Frans Bekkenbauer Yardım Fondunun hesabına köçürüləcəkdir.
Bölmənin digər xəbərləri
