Gələcək davranışın formalaşmasında yeni kəşflərlə bağlı tədqiqat aparılıb
Bakı, 24 mart, AZƏRTAC
Oksford Universiteti və London Universitet Kollecinin tədqiqatçıları hipokampusun yaddaş formalaşdırma və gələcək davranışın proqnozlaşdırılmasında rolunu araşdıran yeni bir tədqiqat yayımlayıblar.
AZƏRTAC “MedicalXpress” portalına istinadla xəbər verir ki, “Nature Neuroscience” jurnalında dərc olunan araşdırma hipokampusun yaddaşları necə parçalayaraq və yenidən təşkil edərək yeni ssenariləri modelləşdirdiyini ortaya qoyur. Əvvəlki araşdırmalar hipokampusun epizodik yaddaş və məkan naviqasiyası ilə əlaqəli olduğunu göstərsə də yeni tədqiqat bu bölgənin kompozisiya yaddaşı adlanan prosesi dəstəklədiyini vurğulayır. Bu keçmiş təcrübələrin əsas komponentlərə ayrılması və yeni xatirələr yaratmaq üçün yenidən təşkil edilməsi deməkdir.
Tədqiqatçılar kompüter simulyasiyaları və hipokampal neyron aktivliyi qeydləri əsasında müəyyən ediblər ki, hipokampal replay (təkrar aktivləşmə) prosesi yaddaşın konsolidasiyası ilə yanaşı, yeni mühitlərə uyğunlaşmanı da dəstəkləyir. Yəni, hipokampus əvvəlki xatirələrdən əldə etdiyi məlumatları gələcək davranışları istiqamətləndirmək üçün istifadə edə bilir. Bu nəticələr hipokampusun passiv bir yaddaş saxlama strukturu olmaqdan çox xatirələri aktiv şəkildə emal edən və yeni öyrənmə olmadan optimal davranışı dəstəkləyən bir sistem olduğunu göstərir. Gələcək tədqiqatlar bu prosesi daha dərindən araşdıraraq yaddaş və qərar qəbuletmə mexanizmlərini daha yaxşı anlamağa kömək edə bilər.
Bölmənin digər xəbərləri
