GƏNCƏDƏ MİLLİ FƏALİYYƏT PLANI HƏYATA KEÇİRİLİR
AZƏRTAC xəbər verir ki, Ombudsman Elmira Süleymanova insan hüquqlarının müdafiəsi üzrə Milli Fəaliyyət Planının (MFP) həyata keçirilməsi vəziyyətinin monitorinqi və təhlili məqsədi ilə Gəncə şəhərində ictimai dinləmələr keçirmişdir.
Tədbirdə Milli Məclisin deputatı Vidadi Məmmədov, şəhər icra hakimiyyəti və bələdiyyələrin, məhkəmə, daxili işlər idarəsi və prokurorluğun, dairə seçki komissiyalarının və digər qurumların nümayəndələri iştirak etmişlər.
E.Süleymanova insan hüquqları sahəsində geniş islahatların aparıldığını, MFP-nin təsdiqindən ötən müddətdə ölkəmizin bütün rayonlarında sənədin tətbiqi ilə bağlı ictimai dinləmələrin keçirildiyini söyləmişdir. Müvəkkil insan haqlarının müdafiəsi istiqamətində səylərin birləşdirilməsinin, xüsusilə qadın və uşaq hüquqlarının pozulması hallarına və narkomaniyaya qarşı mübarizənin gücləndirilməsinin vacibliyini bildirmişdir.
Şəhər icra hakimiyyətinin başçısı Eldar Əzizov Gəncədə MFP üzrə həyata keçirilən tədbirlər barədə məlumat vermişdir.
Səfər çərçivəsində Ombudsman Ədliyyə Nazirliyi Penitensiar Xidmətinin Gəncədəki 2 nömrəli istintaq təcridxanasına baxış keçirmişdir.
