GƏNCLƏR TƏŞKİLATLARI MİLLİ ŞURASININ X HESABAT-SEÇKİ KONFRANSI KEÇİRİLMİŞDİR
Əvvəlcə, Azərbaycan Respublikasının dövlət himni səsləndirilmiş, xalqımızın ümummilli lideri, ulu öndər Heydər Əliyevin və ölkəmizin müstəqilliyi və ərazi bütövlüyü uğrunda şəhid olmuş Vətən övladlarının xatirəsi bir dəqiqəlik sükutla yad olunmuşdur.
Milli Məclis deputatlarının, dövlət və qeyri-hökumət təşkilatları nümayəndələrinin və çoxsaylı gənclərin iştirak etdiyi tədbirdə ARGTMŞ-nin sədri, Milli Məclisin deputatı Fuad Muradov rəhbərlik etdiyi təşkilatın son iki ildə gördüyü işlər, həyata keçirdiyi layihələr, gənclərin müxtəlif sahələrdə problemlərinin həlli və onların işlə təmin olunmasında əldə olunmuş uğurlar barədə hesabat məruzəsi ilə çıxış etmişdir. Bildirmişdir ki, 1995-ci ildə 10 gənclər təşkilatı tərəfindən təsis edilən ARGTMŞ-nin tərkibində hazırda 65 ictimai qurum təmsil olunur. Təkcə son bir ildə 18 layihə həyata keçirən Şura, bir sıra beynəlxalq təşkilatların üzvü olmaqla, Azərbaycanın bugünkü reallıqlarını dünya ictimaiyyətinə çatdırmağa çalışır.
Gənclər təşkilatlarının rəhbərləri Şuranın işini yüksək qiymətləndirmişlər.
Müzakirələrdən sonra Fuad Muradov açıq səsvermə yolu ilə yenidən iki il müddətinə qurumun sədri vəzifəsinə seçilmişdir.
