Gənclərin ətraf mühit sahəsində bilik və bacarıqları artırılır
Bakı, 23 aprel (AZƏRTAC). Ümummilli lider Heydər Əliyevin 90 illik yubileyi ilə əlaqədar Ekologiya və Təbii Sərvətlər Nazirliyi aprelin 23-də Azərbaycan Turizm İnstitutunda təhsil alan tələbələrin ətraf mühit və təhlükəsizlik sahəsində bilik və bacarıqlarının artırılması məqsədi ilə tədbir keçirmişdir.
Nazirliyin mətbuat xidmətindən AZƏRTAC-a bildirmişlər ki, ulu öndər Heydər Əliyevin ətraf mühitin mühafizəsi sahəsində ideyaları, həmçinin ölkəmizdə ekoloji vəziyyətin yaxşılaşdırılması istiqamətində görülmüş işlər barədə tədbir iştirakçılarına ətraflı məlumat verilmişdir.
Eyni zamanda, ətraf mühit və təbii sərvətlərin qorunmasında ekoloji maarifləndirmənin rolu, su ehtiyatlarının idarə olunması, iqlim dəyişmələri, yaşıl iqtisadiyyat və davamlı inkişaf, işğal olunmuş ərazilərdə ətraf mühitə dağıdıcı təsirin müəyyənləşdirilməsi və s. mövzularda tələbələr məlumatlandırılmış və onların sualları cavablandırılmışdır.
Bölmənin digər xəbərləri
