GÖYÇAYDA BUĞDA SƏPİNİ BAŞA ÇATMIŞDIR
Göyçay rayonunda “Kənd təsərrüfatı məhsulları istehsalçılarının toxum, gübrə və damazlıq heyvanları ilə təmin edilməsinə əlavə dəstək verilməsi ilə əlaqədar bəzi məsələlər barədə” Nazirlər Kabinetinin qərarı uğurla icra edilir.
Rayon icra hakimiyyətinin aqrar şöbəsindən AZƏRTAC-a bildirmişlər ki, həmin qərara müvafiq olaraq buğda istehsalı ilə məşğul olan özəl toxumçuluq təsərrüfatı tərəfindən dövlət vəsaiti hesabına idxal edilmiş 30 tona yaxın yüksək reproduksiyalı buğda toxumu alınmış və əkin optimal müddətdə başa çatdırılmışdır. 150 hektara toxumluq buğda sortu səpilmiş və artıq həmin sahələrdə normal çıxış alınmışdır. Bununla yanaşı, mövcud özəl toxumçuluq təsərrüfatları tərəfindən 160 hektar sahədə əlavə məhsuldar yerli buğda toxumu da əkilmişdir. Bu, gələcəkdə rayon taxılçılarının keyfiyyətli buğda toxumu ilə təminatının yaxşılaşdırılmasında müstəsna rol oynayacaqdır. Buğda istehsalı ilə məşğul olan özəl toxumçuluq təsərrüfatlarına güzəştli qiymətlərlə superfosfat gübrəsi də verilmişdir. Dövlət yardımından bəhrələnən taxıl istehsalçıları bu il daha çox sahədə toxum səpini aparacaqlar. Bugünədək 12 min 200 hektar sahədə taxıl əkilmişdir. Bunun 7 min 150 hektarını buğda, 5 min 50 hektarını arpa təşkil edir.
Bölmənin digər xəbərləri
