Gözün buynuz qişasının idxal və ixracı zamanı tələb olunan sənədlər yeniləri ilə əvəzlənib
Bakı, 30 aprel, AZƏRTAC
Gözün buynuz qişasının idxal və ixracı zamanı tələb olunan sənədlər başqa sənədlər ilə əvəz olunub.
AZƏRTAC xəbər verir ki, bu barədə Nazirlər Kabinetinin “Gömrük sərhədindən keçirilən malların və nəqliyyat vasitələrinin bəyan edilməsi Qaydaları”na etdiyi dəyişikliklərdə bildirilib.
Dəyişikliklər gözün buynuz qişasının Azərbaycana idxalı və ixracı prosedurunu müəyyənləşdirir.
Belə ki, göz qişası idxal edildikdə gözün buynuz qişasının köçürülməsi ehtiyacları üçün gətirilməsi nəzərdə tutulan resipiyentin ixtisaslaşdırılmış tibb müəssisəsinə sifarişi, gözün buynuz qişasını tədarük edən qurumla (Göz Bankı) ixtisaslaşdırılmış tibb müəssisəsi arasında bağlanılmış müqavilə və gözün buynuz qişasının Göz Bankı Assosiasiyaları Qlobal İttifaqı (Global Alliance of Eye Bank Associations) tərəfindən akkreditasiya olunmuş Göz Bankı tərəfindən tədarük olunmasını təsdiq edən sənəd tələb olunacaq.
Gözün buynuz qişası ixrac edildikdə isə gözün buynuz qişasının köçürülməsi ehtiyacları üçün aparılması nəzərdə tutulan resipiyent barədə məlumatlar, Göz Bankı Assosiasiyaları Qlobal İttifaqı (Global Alliance of Eye Bank Associations) tərəfindən akkreditasiya olunmuş gözün buynuz qişasını qəbul edən Göz Bankı ilə ixtisaslaşdırılmış tibb müəssisəsi arasında bağlanılmış müqavilə təqdim edilməlidir.
Bölmənin digər xəbərləri
