GÜLƏŞ MƏŞQÇİLƏRİ VƏ HAKİMLƏRİ ÜÇÜN RESPUBLİKA SEMİNARI KEÇİRİLİR
Bakı, 21 dekabr (AZƏRTAC). Dekabrın 21-də Gənclər və İdman Nazirliyi, Azərbaycan Güləş Federasiyası, Azərbaycan Dövlət Bədən Tərbiyəsi və İdman Akademiyasının (ADBTİA) “Güləşmə və onun metodikası” kafedrasının birgə təşkilatçılığı ilə sərbəst və yunan-Roma güləşi üzrə məşqçi və hakimlər üçün nəzəri və təcrübi məşğələlərdən ibarət ikigünlük respublika seminarı başlanmışdır.
Açılış mərasimində çıxış edən gənclər və idman nazirinin müavini İsmayıl İsmayılov belə seminarların əhəmiyyətindən danışmış, Azərbaycan güləş məktəbinin ənənələrini xüsusi qeyd etmişdir.
Məşğələlər zamanı məşqçi və hakimlərə yeniyetmə idmançıların hazırlanmasında respublika yarışlarının rolu, güləşçilərin hazırlığı zamanı müasir məşq metodlarından istifadə, gənc idmançıların fərdi məşq planlarının tərtibi və digər mövzulara həsr olunmuş məruzələr oxunacaqdır.
Nəzəri və sərbəst güləş üzrə təcrübi məşğələlər ADBTİA-nın akt zalında, yunan-Roma güləşi üzrə təcrübi məşğələlər isə Tofiq Bəhramov adına Respublika stadionunun güləş zalında keçirilir. Seminarın sonunda “Güləşi necə öyrənməli?” filmi nümayiş olunacaqdır.
Bölmənin digər xəbərləri
