GÜRCÜSTAN PREZİDENTİ MİXAİL SAAKAŞVİLİNİN NİTQİ
Hörmətli Prezident Əliyev,
Hörmətli Baş nazir Ərdoğan,
Hörmətli qonaqlar, xanımlar və cənablar!
Qaz layihəsi bizim ölkələrimiz üçün vacibdir. Çünki bu, təktərəfli əlaqələri sona çatdırdı və çoxtərəfli əlaqələrə yol açdı. Bizim siyasi vəziyyətimizin dəyişməsinə və beynəlxalq əlaqələrimizin inkişafına yol açdı. Artıq ölkələrin əlaqələri daha çox sülh və tərəfdaşlıq yolu ilə qurulur. Əlaqələrin heç bir şəkildə təzyiq və müharibə yolu ilə davam etdirilməsi mümkün deyildir. Mən xüsusən Sovetlər Birliyinin süqutundan sonra müstəqillik əldə etmiş ölkələrdəki, bu regionlardakı vəziyyətdən danışmaq istəyirəm. Mən heç vaxt Gürcüstanın dəhliz vəzifəsi daşıdığını və bu layihədə dəhliz olduğunu qəbul etmirəm. Çünki reallıqda biz burada təkcə əməkdaşlıqdan, çox güclü beynəlxalq şirkətlərlə əlaqədə ətraf mühitin qorunmasından və iqtisadi inkişafdan danışmırıq. Neft kəmərinin tikilməsi təkcə iqtisadiyyatın inkişafı mənasına gəlmir. Eyni zamanda, ölkəmizdə standartların, yeni ətraf mühiti qoruma mexanizminin qurulmasından, həyat standartlarının artırılmasından, habelə yeni enerji strategiyasının artıq həyata keçirilməsindən və ölkəmizdə artıq korrupsiyanın olmadığından danışa bilərəm. Bir il bundan əvvəl enerji sahəsində özəlləşdirmə apardıq və özəl sektora bu hüquqları verdikdən sonra ölkəmizdə daha az korrupsiya olmasına və daha çox bazar iqtisadiyyatı əlaqələrinin bərqərar edilməsinə nail olduq. Gürcüstan artıq bir postsovet ölkəsi deyil və olmayacaqdır. Biz artıq Qərb standartlarında işləyirik və Gürcüstan həm Qərb ölkələrinin, həm də, ələlxüsus, Türkiyənin ən böyük tərəfdaşlarından biridir.
Bildiyiniz kimi, Türkiyə Gürcüstanın artıq ən yaxın iqtisadi tərəfdaşıdır. Baş nazir Ərdoğan Gürcüstana səfər edərkən bizim investisiya mühitimizin inkişafına dair böyük layihələrdən danışdı. Biz artıq Türkiyə ilə Gürcüstan arasında viza rejiminin olmadığını bəyan etdik. Gürcüstanda ən çox şəffaflığı olan sərhəd rejimi yaradılmışdır. Bunun əsasında yüksək səviyyədə dostluq mühiti qurduq. Türkiyə ilə Gürcüstan arasında fərqli layihələri həyata keçiririk. Batumi aeroportu Türkiyə şirkəti tərəfindən yenidən qurulur və noyabrda istifadəyə veriləcəkdir.
Ondan sonra bir çox iş adamı İstanbuldan Batumiyə rahat gəlib-gedəcək və hətta sərhədlərdən şəffaf şəkildə istifadə edə biləcəkdir.
Bu gün iki ölkə arasında texnoloji bilgilərin paylaşılmasını, özəl sektor nümayəndələrinin Gürcüstana daha çox cəlb edilməsini, ehtiyatlardan daha səmərəli istifadə olunmasını və Türkiyə ilə Gürcüstanın yeni bir iqtisadi əməkdaşlıq səviyyəsinə çıxdığını görürük. Yeni investisiyalar isə ölkəmizdə yeni iş yerlərinin açılmasına, iqtisadi və siyasi sabitliyə imkan yaradacaqdır. Eyni zamanda, qeyd etmək istəyirəm ki, zati-aliləri Türkiyə Prezidentinin dediyi kimi, iki ölkə arasındakı əməkdaşlıq, doğrudan da yeni bir mərhələyə çıxmışdır. Daha rahat nəqliyyat imkanları, daha çox investisiya və iqtisadi əlaqələr hər iki ölkənin tezliklə yeni, inkişaf etmiş iqtisadiyyata malik olmasına yol açmaqdadır.
Azərbaycan da artıq yeni iqtisadi əlaqələr mərhələsinə keçibdir. Biz fərqli mərhələlərdə fərqli çətinliklərlə üzləşdik. Bu çətinlikləri bir yerdə birgə səylərlə dəf etdik. Hazırda Qars-Axalkalaki-Tbilisi-Bakı dəmir yolunun inşasını yeni əməkdaşlıq mərhələsi kimi görürük. Axalkalaki bölgəsinə daha çox diqqət yetirilməsi, daha çox investisiya qoyuluşunun təmin edilməsi bölgəni tamamilə yeni səviyyəyə çıxaracaqdır. Biz Gürcüstan və Azərbaycan hazırda dünyada ən sürətlə inkişaf edən ölkələrik.
Mən öz təşəkkürlərimi lord Brauna, Devid Vudvorda bildirmək istəyirəm. Siz bilirsiniz ki, ilk növbədə, Azərbaycanın ümummilli lideri Heydər Əliyevin qətiyyəti BTC layihəsinin mümkünlüyünü göstərirdi. Onu da demək istəyirəm ki, burada gələcəyə baxışın olması da vacibdir və uzunmüddətli layihənin gerçəkləşməsi üçün inam lazımdır. Bu məsələləri inhisarçılıqla həll etmək çətin olacaq, mümkün olmayacaqdır. Burada alternativlər daha çox olmalıdır. İqtisadi inkişafa nail olmaq üçün çox fərqli yollar bu layihə kimi kağız üzərində işlənilməlidir. Çünki bütün bu amillər olmadan siz parlaq gələcəyi fikirləşə bilməzsiniz. Çünki biz hər şeydən əvvəl, sabitliyə, təhlükəsizliyə və yüksək rifaha nail olmaq istəyirik. Burada haqqında danışdığımız layihə, onun başa çatması bizə daha çox müstəqillik təmin edir. Bu, Ceyms Bond filmi deyildir. Sizin gördüyünüz bugünkü hadisə bir reallıqdır. Biz konfransda qazın Gürcüstanın, Türkiyənin fərqli bölgələrinə, Avropanın fərqli ölkələrinə çatdırılması haqqında danışacağıq. Bilirsiniz ki, bir zamanlar Bakı-Tbilisi-Ceyhan layihəsi olduğu kimi, qaz layihəsi də sıfırdan başlayırdı. Bir zamanlar bu danışıqlar Türkiyə ilə Azərbaycan arasında aparılırdısa, indi artıq dünya ölkələrinin də iştirakı ilə böyük beynəlxalq enerji layihələrindən söhbət edirik. Mən sizə təşəkkürlərimi bildirirəm və yeni uğurlar arzulayıram.
X X X
Sonra Türkiyə Prezidenti Əhməd Necdət Sezər nitq söylədi.
Bölmənin digər xəbərləri
