Tbilisi, 9 yanvar, AZƏRTAC

Gürcüstanda 2003-2012-ci illərdə hakimiyyətdə olan rejimin fəaliyyətini öyrənmək üçün müvəqqəti istintaq komissiyası yaradılacaq. Cinayətkarların cəzalandırılmasını təmin etmək üçün hazırlanacaq hesabat prokurorluğa təqdim olunacaq.

AZƏRTAC xəbər verir ki, bu barədə parlament çoxluğunun lideri Mamuka Mdinaradze məlumat verib.

Onun sözlərinə görə, müvəqqəti istintaq komissiyası parlamentin yaz sessiyasının ilk həftəsində yaradılacaq. Komissiya rejimin və rejimin siyasi məmurlarının 2003-2012-ci illərdəki fəaliyyətini öyrənəcək.

“Gürcüstanda 2003-2012-ci illərdə hakimiyyətdə olduğu dövrdə Gürcüstan dövlətinə və gürcü xalqına qarşı çoxlu cinayətlər törədən radikal müxalifət var. Bu siyasi qüvvə 2012-ci ildən indiyədək Gürcüstan siyasətində təhrikçi funksiyasını yerinə yetirərək, Gürcüstanın milli maraqlarını açıq şəkildə qarşı-qarşıya qoyur və Gürcüstanda sağlam siyasi sistemin qurulmasına həlledici maneə yaradır. Lakin bu siyasi qüvvənin mahiyyətini nəzərə alsaq, aydındır ki, nəzəri cəhətdən hakimiyyətə qayıdışında o, şübhəsiz ki, yeni münasibət və enerji ilə eyni tipli cinayətləri törədəcək və bunun üçün də ona yaşıl işıq yandırılacaq. Cəmiyyətin əhəmiyyətli bir hissəsi yaşlarına görə qanlı “Milli Hərəkat” rejiminin törətdiyi cinayətlərin şahidi olmayıb və bir çox insan bu cinayətləri ən azı emosional müstəvidə unudub. Cəmiyyət avtoritar rejimin törətdiyi cinayətləri daim xatırlamalıdır ki, gələcəkdə təkrarlanmasın”, – deyə Mdinaradze vurğulayıb.

Xətayi Əzizov

AZƏRTAC-ın xüsusi müxbiri

Tbilisi