GÜRCÜSTANDA BEYNƏLXALQ POEZİYA FESTİVALI KEÇİRİLƏCƏKDİR
AZƏRTAC-ın xüsusi müxbiri xəbər verir ki, iyulun 14-də Gürcüstanda Vladimir Mayakovskinin anadan olmasının 115-ci və Nodar Dumbadzenin anadan olmasının 80-ci ildönümünə həsr edilmiş II Beynəlxalq Rusiya-Gürcüstan poeziya festivalı keçiriləcəkdir. Festivalda dünyanın 21 ölkəsindən, o cümlədən Azərbaycandan rusdilli yazıçı və şairlər iştirak edəcəklər.
Təntənəli tədbirlər Tbilisi, Mtsxeta, Siqnaxi, Tsinandali, Gürcaani və Batumi şəhərlərində, eləcə də Vladimir Mayakovskinin doğulduğu Baqdadi kəndində keçiriləcəkdir. Festivalın proqramına poeziya gecələri, “dəyirmi masa” görüşləri, sərgilər daxildir. İyulun 24-də Bütün Gürcüstanın katolikos-patriarxı II İliya festival iştirakçılarını qəbul edəcəkdir.
Festivalın təşkilatçılarının fikrincə ədəbi forumun əsas məqsədi qədim ədəbi ənənələri davam etdirmək, müxtəlif ölkələrdən olan şairlərlə əlaqələr yaratmaq, son illər az qala unudulmuş qarşılıqlı tərcümə mexanizmini tənzimləməkdir.
İyulun 26-da başa çatacaq fesivalın materialları əsasında “Dialoq” adlı məcmuə çap ediləcək və dünyanın ən iri kitabxanalarına göndəriləcəkdir.
Bölmənin digər xəbərləri
