Gürcüstanda Cenevrə Beynəlxalq Danışıqlarının 65-ci raunduna hazırlıq iclası keçirilib
Tbilisi, 16 oktyabr, AZƏRTAC
Gürcüstan Xarici İşlər Nazirliyində (XİN) Avropa İttifaqı, BMT və ATƏT-dən olan həmsədrlərin iştirakı ilə Cenevrə Beynəlxalq Danışıqlarının 65-ci raunduna hazırlıq görüşü keçirilib.
AZƏRTAC xəbər verir ki, bu barədə Gürcüstan XİN-dən məlumat verilib.
Bildirilib ki, iclasa gürcü tərəfdən xarici işlər nazirinin müavini, Gürcüstan nümayəndə heyətinin rəhbəri Laşa Darsaliya rəhbərlik edib.
Görüşdə danışıqlar formatının səmərəliliyinin artırılması, 2008-ci il 12 avqust atəşkəs sazişi üzrə Rusiyanın beynəlxalq öhdəliklərinin yerinə yetirilməsi, eləcə də qaçqın və məcburi köçkünlərin təhlükəsiz şəkildə geri qayıtması məsələləri müzakirə olunub.
Tərəflər, həmçinin Hadisələrin Qarşısının Alınması və Müdaxilə Mexanizminin (IPRM) bərpa edilməsinin vacibliyini vurğulayıblar. Gürcüstan tərəfi işğal olunmuş ərazilərdə və sərhədyanı zonalarda insan hüquqları və humanitar vəziyyətlə bağlı narahatlıqlarını diqqətə çatdırıb.
Nazirliyin bəyanatında bildirilib ki, Abxaziya bölgəsində etimadın bərpasına yönəlmiş layihələrin məhdudlaşdırılması və bloklanması kimi hallara da toxunulub.
Cenevrə Beynəlxalq Danışıqlarının 65-ci raundunun 2025-ci il noyabrın 11–12-də keçirilməsi planlaşdırılır.
Xətayi Əzizov
AZƏRTAC-ın xüsusi müxbiri
Tbilisi
Bölmənin digər xəbərləri
