Gürcüstanda Şərq-Qərb magistralının bir neçə hissəsinin tikintisi bu il başa çatacaq
Tbilisi, 7 yanvar, AZƏRTAC
Gürcüstanın əsas magistralının, “Orta Dəhliz”in bir hissəsi olan və Asiyanı Avropa ilə birləşdirən Şərq-Qərb magistralının bir neçə hissəsinin tikintisi 2024-cü ildə yekunlaşacaq.
AZƏRTAC xəbər verir ki, Gürcüstan Avtomobil Yolları Departamentinin proqnozlarına görə, Rikoti aşırımından keçən ən çətin hissənin, həmçinin Samtredia-Qriqoleti, Qriqoleti-Çoloki hissələrinin və Batumi dolama yolunun tikintisi bu il başa çatacaq.
Rikotidən keçən yol Şərqi və Qərbi Gürcüstanı birləşdirir və Şərq-Qərb beynəlxalq magistralının bir hissəsidir. 51,6 kilometr uzunluğunda olan yeni dördzolaqlı yol 97 körpü və 51 tuneldən ibarət olacaq ki, bu da səyahət vaxtını əhəmiyyətli dərəcədə azaldacaq. Qırmızı Körpüdən (Azərbaycanla sərhəd) Sarpiyə (Türkiyə ilə sərhəd) qədər olan yolun bütün hissələrinin tikintisi başa çatdıqdan sonra isə bu məsafəni avtomobillə 8 saat əvəzinə 4-4,5 saata getmək mümkün olacaq.
Şərq-Qərb magistralı və ya Avropa Tranzit Yolu (E-60) Gürcüstanın Azərbaycanla sərhədindən başlayır və Qara dəniz sahilində, Poti limanı yaxınlığında bitir. Gürcüstan ərazisində dəhlizin uzunluğu 392 kilometrdir.
2024-cü ildə Gürcüstanda sərhədlərə qədər üç mühüm yol hissəsinin tikintisinə başlanacaq. Magistralın Batumi-Sarpi (Türkiyə sərhədi), Tbilisi-Sadaxlo (Ermənistan sərhədi) və Tbilisi-Qırmızı Körpü (Azərbaycan sərhədi) hissələri yenidən qurulacaq.
Xətayi Əzizov
AZƏRTAC-ın xüsusi müxbiri
Tbilisi
Bölmənin digər xəbərləri
