GÜRCÜSTANIN DÖVLƏT NAZİRİ MƏTBUAT KONFRANSI KEÇİRMİŞDİR
Gürcüstanın bu yaxınlarda üzləşdiyi enerji problemi ilə əlaqədar göstərilən köməyə görə Azərbaycan Prezidentinə və xalqına dərin minnətdarlığını bildirən Georgi Xaindrava səfərindən məqsədin Gürcüstandan didərgin salınmış axısqa türklərinin öz vətənlərinə qayıtması istiqamətində görülən işlərlə bağlı olduğunu açıqlamışdır.
O bildirmişdir ki, 60 il əvvəl Gürcüstandan deportasiya edilmiş axısqa türklərinin repatriasiyası üçün xüsusi komissiya yaradılmışdır. Komissiyanın üzvləri Azərbaycanda, Orta Asiya respublikalarında, Rusiyada, Türkiyədə məskunlaşmış axısqa türklərinin vəziyyətini öyrənirlər.
G.Xaindrava respublikamızdakı axısqa türklərinin “Vətən” cəmiyyətinin rəhbərləri ilə görüşdüyünü, yanvarın 31-də onların yığcam məskunlaşdığı Saatlı rayonuna səfər edəcəyini bildirmişdir.
Dövlət naziri Gürcüstana qayıdanların müvafiq şəraitlə təmin edilməsi üçün beynəlxalq donorlarla birlikdə xüsusi fond yaradılacağını diqqətə çatdırmışdır.
Bölmənin digər xəbərləri
