HAKİMLİYƏ NAMİZƏDLƏRLƏ İLKİN TƏDRİS KURSLARI DAVAM EDİR
Müasir tədris üsullarından istifadə edilməklə 5 ay müddətində keçirilən bu kursların nüfuzlu beynəlxalq ekspertlərin iştirakı ilə hazırlanmış, namizədlərin hakim olmaq üçün lazımi biliyə və peşə hazırlığına yiyələnmələrinə xüsusi diqqət yetirilərək, proqrama ən aktual, o cümlədən insan haqları, korrupsiya, məhkəmə etikası, hakimin davranışı, məhkəmədə işin səmərəli təşkili və digər məsələlərə dair mövzular daxil edilmiş, müxtəlif instansiya məhkəmələrində stajkeçmə nəzərdə tutulmuşdur.
Ədliyyə Nazirliyi yanında Hüquq-Tədris Mərkəzində təşkil edilən kurslarda yüksək məhkəmə hakimlərinin, görkəmli alimlərin, zəngin biliyə və təcrübəyə malik olan şəxslərin, habelə nüfuzlu xarici mütəxəssislərin, o cümlədən Avropa Ümumi Hüquq Mərkəzinin direktoru, professor S.Floqaitis, Almaniya Texniki Əməkdaşlıq Cəmiyyətinin Azərbaycan və gənc müstəqil ölkələrdə hüquq islahatları layihəsinin rəhbəri, professor R.Knipper, Fransa Apellyasiya Məhkəməsinin hakimi P.Henriot və digərlərinin mühazirələri təşkil olunmuşdur.
Kursun tədris proqramına uyğun olaraq Ədliyyə naziri, Məhkəmə-Hüquq Şurasının sədri Fikrət Məmmədov məhkəmə sisteminin müasirləşdirilməsi problemləri mövzusunda dinləyicilər qarşısında çıxış etmiş, ölkəmizin Prezidenti İlham Əliyevin tapşırığı ilə ədalət mühakiməsinin səmərəliliyinin artırılması üzrə həyata keçirilən tədbirləri qeyd etmiş, dövlətimizin başçısının məhkəmə sisteminin müasirləşdirilməsi ilə bağlı 2006-cı il 19 yanvar tarixli Fərmanının xüsusi əhəmiyyətini vurğulayaraq, nəzərdə tutulmuş mühüm tədbirləri açıqlamışdır.
O, məhkəmə sistemində nəzəri və peşə hazırlığı ilə yanaşı, yüksək insani keyfiyyətlərinə, o cümlədən mənəvi təmizliyinə, ədalətliliyinə və qərəzsizliyinə, insanlara qayğıkeş münasibətinə görə fərqlənən şəxslərin təmsil edilməsi zəruriliyini bildirmiş, yeni, ən müasir üsullarla seçilmiş hakimliyə namizədlərin bu ali tələblərə cavab verəcəyinə ümidvar olduğunu bildirmişdir.
