Helsinkidə Dünya Azərbaycanlılarının Həmrəyliyi Günü münasibətilə tədbir keçirilib
Helsinki, 30 dekabr, Nigar Cəfərli, AZƏRTAC
Azərbaycan-Finlandiya Dostluq Cəmiyyətinin təşkilati dəstəyi ilə Helsinkidə 31 dekabr - Dünya Azərbaycanlılarının Həmrəyliyi Gününə həsr olunmuş bayram gecəsi keçirilib.
Əvvəlcə Azərbaycanın Dövlət himni səslənib.
Sonra söz Azərbaycan diasporunun ağsaqqalı, Finlandiya Konservatoriyasının professoru, Kokkola şəhərinin fəxri vətəndaşı Cahangir Ələkbərova verilib. O, gecəyə toplaşanları Dünya Azərbaycanlılarının Həmrəyliyi Günü münasibətilə təbrik edərək, xalqımızı müstəqil Azərbaycanın mənafelərinin müdafiəsi və onun beynəlxalq nüfuzunun artması işində dövlətimizin və Prezident İlham Əliyevin ətrafında daha sıx birləşməyə çağırıb.
Finlandiyada Azərbaycan diasporunun başçısı, Azərbaycan-Finlandiya Dostluq Cəmiyyətinin sədri Təranə Nəzərova hamını Dünya Azərbaycanlılarının Həmrəyliyi Günü və qarşıdan gələn Yeni il münasibətilə təbrik edərək ümidvar olduğunu bildirib ki, 2015-ci il Azərbaycan üçün uğurlu olacaq, Ermənistan-Azərbaycan, Dağlıq Qarabağ münaqişəsi sülh yolu ilə həll ediləcək. Azərbaycan diasporunun başçısı bildirib ki, hazırda İlham Əliyevin rəhbərlik etdiyi Azərbaycan həyatın bütün sahələrində qazandığı nailiyyətlər ilə dünyanın diqqət mərkəzindədir. Ölkəmizin qısa müddətdə istər daxili, istərsə də xarici siyasətdə qazandığı uğurlar, Azərbaycanın sürətlə inkişaf edən demokratik və güclü dövlət kimi təşəkkül tapması, etibarlı və sülhpərvər tərəfdaş kimi nüfuz qazanması İlham Əliyevin adı ilə bağlıdır.
Tatar və türk diasporlarının üzvləri Azərbaycan xalqına xoş arzularını bildiriblər.
Tədbirdə Azərbaycan diasporunun nümayəndələri, Finlandiya XİN-in əməkdaşları, bu ölkədə fəaliyyət göstərən tatar, türk, rus icmalarının üzvləri iştirak ediblər. Gecədə Azərbaycan diasporu nümayəndələrindən məşhur pianoçu, konservatoriyanın müəllimi Kamal Aşurbəyov, tanınmış bəstəkar, Azərbaycanın Xalq Artisti Rauf Hacıyevin qızı Natella xanım, Finlandiya Milli Opera Teatrının konsertmeysterləri Leyla və Marina Hüseynovalar iştirak ediblər.
Bayram gecəsində Azərbaycan melodiyaları səslənib, qonaqlar milli mətbəximizin yeməklərinin dadına baxıblar.
Nigar Cəfərli
AZƏRTAC-ın xüsusi müxbiri
Bölmənin digər xəbərləri
