Hindistanda bir sutkada koronavirusa 12 mindən çox yoluxma qeydə alınıb
Bakı, 11 iyun, AZƏRTAC
Hindistanda son sutka ərzində koronavirusa rekord sayda - 12 min 375 yoluxma halı qeydə alınıb.
AZƏRTAC bu barədə pandemiyanın statistikasını aparan Worldometer saytına istinadla xəbər verir.
KİV-lərin məlumatına görə, yoluxma sayının artması koronavirusun daha çox yayıldığı Mumbay, Nyu-Dehli və Çennai kimi şəhərlərində səhiyyə xidmətini çətin vəziyyətə salıb.
Həmçinin son sutka ərzində ölkədə həyatını itirən koronavirus xəstələrinin sayı 357 nəfər təşkil edib.
Hindistanda indiyədək 287 min 679 nəfər koronavirus infeksiyasına yoluxub, 8 min 115 nəfər isə COVID-19 xəstəliyi səbəbindən vəfat edib. Hazırda Hindistan yoluxma hallarının sayına görə dünyada altıncı yeri tutur. Koronavirusa yoluxanların sayının kəskin artması hökumətin iki aylıq karantin rejimindən sonra restoranları, ticarət mərkəzlərini və məbədləri açması ilə əlaqələndirilir.
Worldometer saytının Bakı vaxtı ilə bu gün saat 15:40-a olan məlumatına əsasən, dünyada 7 milyon 482 mindən çox yoluxma və 419 min 497 ölüm faktı qeydə alınıb, 3 milyon 798 min xəstə isə sağalıb.
Bölmənin digər xəbərləri
