İdman arenalarına yaxın metro stansiyalarda sərnişin axınının tənzimlənməsi nəzarətdə saxlanılır
Bakı, 17 may, AZƏRTAC
IV İslam Həmrəyliyi Oyunlarının təqviminə uyğun olaraq, yarışların keçirildiyi vaxtlarda idman arenalarına yaxın stansiyalarda sərnişin axınının tənzimlənməsi nəzarətdə saxlanılır.
AZƏRTAC xəbər verir ki, bu barədə "Bakı Metropoliteni" QSC-nin mətbuat xidmətinin rəhbəri Nəsimi Paşayev deyib.
Bildirilib ki, mayın 12-də IV İslam Həmrəyliyi Oyunlarının açılış mərasimi zamanı sərnişinlərə yüksək xidməti ilə seçilmiş "Bakı Metropoliteni" QSC yarışların keçirildiyi günlərdə də fəaliyyətini tədbirlər planına uyğun davam etdirir. Qonaqların daha çox axını müşahidə olunan şəhər mərkəzinə, həmçinin Atletlər kəndinin yerləşdiyi əraziyə yaxın olan "Koroğlu" stansiyasında gücləndirilmiş rejimə müvafiq qaydada daim nəzarət edilir.
Qeyd edək ki, İslam Həmrəyliyi Oyunlarının proqramına daxil olan yarışların keçirildiyi günlərdə "Bakı Metropoliteni" gecə saat 01:00-a qədər fəaliyyət göstərir. Sərnişin axınından asılı olaraq, ehtiyac duyularsa, qrafikin uzadılmasının mümkünlüyü də qüvvədə qalır.
"Bakı Metropoliteni" QSC-nin rəhbərliyi sərnişinlərin, xüsusən də əcnəbi qonaqların xüsusi tələbatını nəzərə alaraq, bu günlərdə könüllülərin də xidmətindən faydalanır. Bu məqsədlə namizədlərdən seçilmiş 30 könüllü növbəli iş rejimi qaydasında yarış məkanlarına və şəhər mərkəzinə yaxın stansiyaların vestibüllərində və platformasında fəaliyyət göstərir. Ötən günlərin təcrübəsi bir daha sübut edir ki, bu uğurlu addım həm qonaqlara xidmət mədəniyyətinin təşkilində, həm də şəhərimizin təbliğatında xüsusi effektli vasitəyə çevrilib. Metropoliten könüllüləri arasında keçirdiyimiz sorğuya əsasən, onlara həm yerli sərnişinlərin, xüsusən də İslam Həmrəyliyi Oyunlarını izləmək üçün bölgələrimizdən gələnlərin, həm də əcnəbi qonaqların müraciəti kifayət qədər çoxdur. İlk günlərdə bu müraciətlərin sayı daha çox olub. Bununla belə, hazırda hər könüllüyə müraciət edən metro istifadəçilərinin sayı kifayət qədər çoxdur ki, onların da böyük qismi əcnəbilərdir.
Onları yarış arenalarına doğru hərəkətlə yanaşı, şəhərimizin sosial-mədəni və iaşə obyektləri, iri ticarət mərkəzləri, gəzməli-görməli yerləri də maraqlandırır. Həm də yarışların ilk günləri ilə müqayisədə bu səpkidə müraciətlərin sayı da artıb. Sərnişinlərin məlumat almaq istədikləri məkanlar arasında İçərişəhər, xüsusən də Qız Qalası, həmçinin Dənizkənarı Milli Park üstünlük təşkil edir. İlk günlərdə metropolitendən istifadə qaydaları, həmçinin gediş haqqının ödənilməsi ilə bağlı məlumat almaq istəyənlərin sayı daha çox olub. Bu mənada məhdud istifadə üçün kartların alınması üstünlük təşkil edir.
Onu da əlavə edək ki, "Bakı Metropoliteni" QSC-də yarış və şəhərin əsas sosial-mədəni obyektlərinin qeyd olunduğu paytaxtın xüsusi xəritəsi olan yaddaş kitabçaları da hazırlanıb. Aksiyanın məqsədi qonaqların bu obyektlərə daha rahat çatmasını təmin etmək, bununla yanaşı, şəhərin digər sosial-mədəni obyektlərini təbliğ etməkdir. Daha geniş auditoriyada yayılmasını təmin etmək üçün yaddaş kitabçaları Bakının ən iri ticarət mərkəzlərinə və mehmanxanalarına təqdim olunub. Ötən günlər onu da bir daha əyani nümayiş etdirdi ki, bu kitabçalar şəhərimizin qonaqlarının ürəyincədir.
""Bakı Metropoliteni" QSC IV İslam Həmrəyliyi Oyunları ərzində fəaliyyətini təsdiq olunmuş tədbirlər planına uyğun qurur. Açılış mərasimində olduğu kimi, mayın 22-də - bağlanış tədbirinin keçiriləcəyi gecə ərzində də metropoliten fəaliyyətini gecə saat 02:00-dək davam etdirəcək. Lakin zərurət yaranarsa, açılış mərasimində olduğu kimi, metropolitenin fəaliyyəti daha gec saatlara qədər uzadılacaq", - deyə N.Paşayev diqqətə çatdırıb.
Bölmənin digər xəbərləri
