“İlhamlı Qələbələr” adlı idman festivalının minifutbol turniri start götürüb
Bakı, 27 noyabr, AZƏRTAC
“BrendSport.az” saytının layihəsi olan və 44 günlük Vətən müharibəsinə həsr olunmuş “İlhamlı Qələbələr” adlı idman festivalı davam edir.
AZƏRTAC xəbər verir ki, bu gün festival çərçivəsində Azərbaycan Futbol Federasiyaları Assosiasiyasının (AFFA) dəstəyi ilə minifutbol turniri strat götürüb.
Tədbir bir dəqiqəlik sükutla başlayıb. Sonra turnir haqqında məlumat verilib və iştirakçılara uğurlar arzulanıb.
Öncə çıxış edən AFFA-nın nümayəndəsi Elxan Həsənzadə turnirin mahiyyətindən danışıb və belə tədbirlərin davamlı olmasının vacibliyini bildirib. AFFA-nın da bu cür tədbirlərə hər zaman dəstək olduğunu vurğulayan Elxan Həsənzadə bundan sonra da öz yardımlarını əsirgəməyəcəklərini bildirib.
Sonra "İlhamlı Qələbələr" layihəsinin Təşkilat komitəsinin sədri “Qızıl fit” sahibi, olimpiya hakimi Hicran Şərifov çıxış edərək, 44 günlük Vətən müharibəsində qazanılan Zəfərin xalqımız və dövlətimiz üçün önəmindən danışıb, Ali Baş Komandan İlham Əliyevin rəhbərliyi ilə qazanılan Zəfərdə hərbçilərimizin göstərdiyi şücaətdən bəhs edib.
Sonda layihənin rəhbəri və ideya müəllifi, “BrendSport.az” saytının baş redaktoru Bəhruz Səmədov çıxış edərək, 44 günlük Vətən müharibəsinə həsr olunmuş “İlhamlı Qələbələr” adlı idman festivalı haqqında danışıb və bu turnirin də festivalın tərkib hissəsi olduğunu iştirakçıların diqqətinə çatdırıb. Fikrini komandalara uğurlar arzulamaqla yekunlaşdıran Bəhruz Səmədov gələcək günlərdə festivalın digər idman növləri ilə davam edəcəyini bildirib.
Turnirin açılışı rəmzi məna daşıyan oyunla - Qazilər komandası ilə incəsənət nümayəndələrini təmsil edən komandaların qarşılaşması ilə başlayıb.
44 günlük Vətən müharibəsində qalıb olmuş qazilər bu oyunda da yüksək peşəkarlıq göstərərək futbolda da zəif olmadıqlarını nümayiş etdiriblər. Belə ki, gərgin, ancaq dostluq şəraitində keçən oyun 7:7 hesablı heç-heçə ilə yekunlaşıb.
Oyundan sonra qazilərimizə AFFA və “BrendSport.az” saytı tərəfindən təşəkkürnamələr, eyni zamanda, turnirə öz dəstəyini əsirgəməyən sponsorlarımız tərəfindən qiymətli hədiyyələr təqdim olunub.
Bundan sonra əsas yarışa start verilib. İlk oyunda Azərbaycan Güləş Federasiyasının Olimpiya, Dünya və Avropa çempionlarından ibarət komandası, “Sportsmen” jurnalının və “Trend” İnformasiya Agentliyinin birgə komandası olan “Zəngəzur”la qarşılaşıb. Maraqlı keçən oyunda çempionlar 7:4 hesablı qələbəyə seviniblər.
İlk oyun gününün ən gərgin oyunu Azərbaycan Televiziyası (AzTV) və “İdman Azərbaycan” kanallarının birgə komandası ilə “Azərbaycan” nəşriyyatının və “BrendSport.az” saytının birgə komandası arasında olub. Belə ki, AzTV və “İdman Azərbaycan” kanallarının birgə komandası oyunun ilk yarısında 3:0 hesabı ilə öndə idilər. Lakin oyunun ikinci hissəsində geridönüş edən “Azərbaycan” nəşriyyatının və “BrendSport.az” saytının komandası 3 cavabsız qol vuraraq oyunu 5 dəqiqəlik 2 hissədən ibarət əlavə vaxta aparıblar. Əlavə vaxtda da daha yaxşı oyun sərgiləyən “Azərbaycan” nəşriyyatının komandası bir qol vuraraq önə keçib və yekunda 4:3 hesabı ilə qələbə qazanıb.
Qeyd edək ki, püşkatmanın nəticələrinə əsasən, “Xəzər” TV-nin rəqibi son anda turnirə qatılmaqdan imtina etdiyinə görə, onlar növbəti tura birbaşa vəsiqə qazanıblar.
Beləliklə, keçiriləcək yarımfinal oyunlarında Azərbaycan Gimnastika Federasiyasının Olimpiya, Dünya və Avropa çempionlarından ibarət komanda ilə “Xəzər” TV-nin komandası, “Azərbaycan” nəşriyyatının və “BrendSport.az” saytının birgə komandası ilə incəsənət nümayəndələrini təmsil edən komandalar qarşı-qarşıya gələcək. Qalib gələn komandalar finalda, məğlub olan komandalar isə 3-cü yer uğrunda mübarizə aparacaq.
Bölmənin digər xəbərləri
