“İmadəddin Nəsimi və folklor” mövzusunda konfransa hazırlıq məsələləri müzakirə edilib
Bakı, 16 oktyabr, AZƏRTAC
Oktyabrın 16-da “Folklorun və Ədəbiyyatın İnkişafına Yardım” İctimai Birliyi tərəfindən “İmadəddin Nəsimi və folklor” mövzusunda Respublika elmi-praktik konfransının keçirilməsi ilə bağlı layihə üzrə seminar təşkil olunub.
AZƏRTAC xəbər verir ki, tədbir dövlət himnimizin səsləndirilməsi ilə başlanıb. Birliyin sədri, AMEA-nın müxbir üzvi, Əməkdar elm xadimi Kamran Əliyev çıxış edərək dahi şairin 650 illik yubileyi ilə bağlı Azərbaycan Prezidentinin müvafiq Sərəncamına əsasən 2019-cu ilin “Nəsimi ili” elan olunduğunu, bununla əlaqədar ölkəmizdə müxtəlif tədbirlər keçirildiyini, bugünkü seminarın da həmin qəbildən olduğunu deyib. Bildirib ki, dahi Nəsiminin əsərləri şifahi xalq ədəbiyyatı nümunələri ilə olduqca zəngindir. Şairin yaradıcılığında klassik ədəbiyyatımızla yanaşı, folklor irsimizin öyrənilməsi xüsusi əhəmiyyət kəsb edir. Çünki dahi söz ustadımız bütün qəlbi, ruhu ilə xalqa bağlı olub. Belə bir layihənin keçirilməsində də məqsəd şairin hər zaman diqqət mərkəzində olan yaradıcılığında folklor qaynaqlarını araşdırmaqdır.
AMEA Folklor İnstitutunun əməkdaşı, filologiya üzrə fəlsəfə doktoru Fidan Qasımova “İmadəddin Nəsimi və folklor” Respublika elmi-praktik konfransına hazırlığın vəziyyəti” mövzusunda çıxış edib. Diqqətə çatdırıb ki, "Folklorun və Ədəbiyyatın İnkişafına Yardım” İctimai Birliyinin “İmadəddin Nəsimi və folklor” mövzusunda Respublika elmi-praktik konfransının keçirilməsi” layihəsi Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının 2019-cu il dördüncü qrant müsabiqəsində qalib olub. Artıq mövzu ilə əlaqədar məruzələr qəbul edilib, qoyulan ümumi elmi məsələnin tələblərinə cavab verən məqalələr seçilib. Burada mühüm məsələ məruzəçilərin əhatə dairəsinin genişləndirilməsidir. Təkcə professor-müəllim heyətinin deyil, həm də tələbələrin və magistrlərin də məruzələrinə yer ayrılıb. Təqdim olunan məqalələrdə Nəsimi yaradıcılığı müxtəlif istiqamətlərdə araşdırılır. Konfrans ərəfəsində həmin məqalələr kitab şəklində nəşr ediləcək.
Folklor İnstitutunun əməkdaşı, filologiya üzrə elmlər doktoru İslam Sadıq Nəsiminin zəngin irsinin öyrənilməsinin əhəmiyyətindən danışıb.
Sonra institutun əməkdaşı, filologiya üzrə fəlsəfə doktoru Aytac Abbasovanın “Folklorla bağlı Nəsimi qəzəlləri və musiqi”, Laçın rayon M.B.Səfərov adına Qozlu kənd tam orta məktəbinin Azərbaycan dili və ədəbiyyat müəllimi Aygün Zülfüqarovanın “İmadəddin Nəsimi, folklor və orta məktəbdə tədrisi məsələləri” mövzusunda məruzələri dinlənilib.
Tədbirdə Laçın rayon M.B.Səfərov adına Qozlu kənd tam orta məktəbinin şagirdləri dahi şairin qəzəllərini söyləyiblər.
Sonda şagirdlərə layihədə fəal iştiraklarına görə təşəkkürnamələr təqdim olunub.
Bölmənin digər xəbərləri
