İMİŞLİ RAYONUNDA MÜHÜM SOSİAL-İQTİSADİ LAHİYƏLƏR HƏYATA KEÇİRİLİR
AZƏRTAC xəbər verir ki, 2008-ci ilin əvvəlindən başlayaraq İmişli rayonunda mühüm sosial-iqtisadi lahiyələr həyata keçirilir.
Son vaxtlar rayon ərazisində fəaliyyət dairəsini getdikcə genişləndirən “Azərsun Holdinq” şirkətlər qrupunun burada istifadəyə verdiyi spirt emalı zavodunda artıq məhsul istehsalına başlanmışdır. Şirkətin rayonda inşa etdiyi bitki yağları və qarışıq yem zavodlarında, habelə suyun təkrar təmizlənməsi sexində tamamlama işləri görülür. “Azərsun Holdinq” yaxın gələcəkdə İmişlidə süd emalı zavodu inşa etməyi də nəzərdə tutmuşdur.
Bundan əlavə, Azərbaycan Kənd İnvestisiya Layihəsinin (AzKİL) maliyyə dəstəyi ilə bu ilin 6 ayı ərzində rayonda bir sıra mühüm sosial layihələr həyata keçirilmişdir. Ümumiyyətlə, AzKİL ilin ilk yarısında rayonda 10 sosial layihənin reallaşdırılmasına 292,3 min manat vəsait ayırmışdır.
Cari ilin altı ayında Azərbaycan Respublikasının Ekologiya və Təbii Sərvətlər Nazirliyi tərəfindən rayonun Qaraqaşlı, Xoşçobanlı, Xubyarlı, Cavadxanlı, Qaradonlu və Göbəktala kəndlərində modul tipli su təmizləyici qurğular əhalinin istifadəsinə verilmişdir. Hazırda Məzrəli və Muradalılı kəndlərində oxşar qurğuların quraşdırılması davam etdirilir.
“Azərsutikinti” Səhmdar Cəmiyyətinin “Muğansutikinti” Törəmə Müəssisəsi isə rayon ərazisindəki Bəhrəmtəpə Hidroqovşağında bərpa işləri aparır.
Bölmənin digər xəbərləri
