“İNGİLİS DİLİNİN İNTENSİV TƏDRİSİ LAYİHƏSİ” ÇƏRÇİVƏSİNDƏ TƏLİM-SEMİNAR KEÇƏN MÜƏLLİMLƏRƏ SERTİFİKATLAR VERİLMİŞDİR
Təhsil Nazirliyi ilə Böyük Britaniyanın “British Council” təşkilatının birgə reallaşdırdığı “İngilis dilinin intensiv tədrisi layihəsi” çərçivəsində təlim-seminar keçən müəllimlərin ikinci qrupuna sertifikatlar təqdim olunmuşdur.
Təhsil Nazirliyindən AZƏRTAC-a bildirmişlər ki, bu münasibətlə təşkil olunmuş tədbirdə təhsil naziri Misir Mərdanov müvafiq layihə barədə məlumat vermiş, təlim-seminarın əhəmiyyətini vurğulamışdır.
Ölkəmizdə aparılan təhsil islahatlarında, xüsusilə tədris prosesinə yeni texnologiyaların tətbiqində ingilis dili müəllimlərinin fəallığını qeyd edən nazir “Ən yaxşı müəllim” müsabiqəsində uğur qazanan müəllimlər arasında ingilis dili müəllimlərinin çoxluq təşkil etdiyini bildirmişdir.
Mərasimdə çıxış edən məktəb direktorları, seminarı aparan müəllimlər fikir və mülahizələrini diqqətə çatdırmışlar.
Sonra təlim-seminarın ikinci qrupunun iştirakçıları olmuş müəllimlərə sertifikatlar təqdim edilmişdir.
Xatırladaq ki, layihə çərçivəsində təlim keçən ingilis dili müəllimlərinin ilk qrupuna sertifikatlar iyulun 11-də verilmişdir.
Bölmənin digər xəbərləri
