İşğaldan azad olunmuş ərazilərimizdə bərpa prosesi düşünülmüş və planlı şəkildə həyata keçirilir
Bakı, 2 fevral, AZƏRTAC
İşğaldan azad olunmuş ərazilərimizdə bütün məsələlər, o cümlədən bərpa prosesi düşünülmüş və planlı şəkildə həyata keçirilir. Prezident İlham Əliyevin də bəyan etdiyi kimi, hazırda minalardan təmizləmə işləri aparılır. Bu, təhlükəsizlik və bərpa prosesinin sürətlənməsini şərtləndirən əsas amildir. Təbii ki, işğal nəticəsində vurulmuş ziyanın qiymətləndirilməsi, infrastruktur layihələrinin, sosial obyektlərin inşası, yaşayış üçün şəraitin yaradılması əsas görüləcək işlərdir. İlkin monitorinqin nəticələrinə baxdıqda aydın olur ki, azad olunmuş ərazilərdəki infrastrukturun və mədəni irsin 90 faizdən çoxu dağıdılıb. Bu isə o deməkdir ki, bu ərazilər tamamilə yenidən qurulacaq. Bərpa prosesi isə Prezident İlham Əliyevin tapşırığına əsasən, orijinal simanın qorunması prinsipi ilə aparılacaq. Burada istər yerli, istərsə də beynəlxalq mütəxəssislərin iştirakı nəzərdə tutulur.
AZƏRTAC xəbər verir ki, bu fikirləri Milli Məclisin deputatı Könül Nurullayeva bildirib.
Deputat deyib ki, bərpa strategiyası azad olunmuş bütün ərazilərin, xüsusilə də mədəniyyət paytaxtımız Şuşanın mədəni irsinin özünə qaytarılmasını ehtiva edir. Təsadüfi deyil ki, Azərbaycan Prezidenti azad olunmuş ərazilərdə ilk xüsusi nümayəndəsini Şuşaya təyin etdi. Şuşa Azərbaycanın mədəniyyət paytaxtı olmaqla yanaşı, həm də bizim üçün mənəvi dəyərdir. Ümumiyyətlə, Azərbaycan Prezidenti tərəfindən işğaldan azad olunmuş ərazilərdə yaradılmış xüsusi idarəetmə strukturunun əsas fəaliyyət istiqaməti bütün neqativ halların qarşısının alınması, səmərəli və operativ idarəetmənin həyata keçirilməsindən ibarətdir.
“Ötən gün Prezident İlham Əliyev bir daha bəyan etdi ki, bərpa prosesi ilə bağlı Əlaqələndirmə Qərargahına Prezident Administrasiyasının rəhbəri rəhbərlik edir. Bütün təkliflər, təşəbbüslər məhz ora göndərilməlidir. Razılaşdırılmadan işğaldan azad olunmuş ərazilərdə nümayəndəliklərin açılacağı barədə bəyanatlar özbaşınalıqdır və yolverilməzdir. Bu mənada, hər kəs Prezident İlham Əliyevin bu xəbərdarlığından nəticə çıxarmalıdır. Dövlət başçısı açıq şəkildə bəyan etdi ki, xüsusilə Şuşanın bərpasında memarlar, tarixçilər, ən əsası da şuşalılar iştirak etməlidirlər. Çünki Şuşa məhz onların şəhəridir. Dövlət başçısının bəyan etdiyi kimi, Şuşanın xüsusi plan əsasında bərpası onun təkcə Azərbaycanın mədəniyyət mərkəzi deyil, eləcə də regionun və dünyanın mədəniyyət mərkəzlərindən birinə çevrilməsini nəzərdə tutur”, - deyə K.Nurullayeva vurğulayıb.
Deputat bildirib ki, 44 günlük Vətən müharibəsinin yaratdığı reallıqlar sayəsində Cənubi Qafqaz regionunda ortaq mədəni dəyərlər də artıq Azərbaycanın adı ilə bağlıdır. Mədəniyyət paytaxtımızda keçiriləcək beynəlxalq festivallar sayəsində Şuşanın nüfuzu daha da artacaq. Fundamental bərpa strategiyası sayəsində bütövlükdə işğaldan azad olunmuş ərazilərimiz regionun ən inkişaf etmiş zonasına çevriləcək.
Bölmənin digər xəbərləri
