İslam Əməkdaşlıq Təşkilatı Misirin Liviyaya dair sülh planını dəstəkləyib
Qahirə, 11 iyun, AZƏRTAC
İslam Əməkdaşlıq Təşkilatının (İƏT) Baş Katibliyi Liviyada sülhün bərqərar olmasına dair Misirin planını dəstəkləyib. Təşkilatın bəyanatında qeyd edilib ki, münaqişənin siyasi həlli üzrə Qahirə Bəyannaməsi təqdirəlayiqdir.
AZƏRTAC xəbər verir ki, iyunun 10-da Azərbaycanın da iştirakı ilə keçirilən İƏT İcraiyyə Komitəsi Xarici İşlər nazirlərinin növbədənkənar açıq virtual iclasında Misir Prezidenti Əbdülfəttah əs-Sisinin atəşkəsə nail olunması və tərəflər arasında dialoqun başlanması barədə təklifi Liviyada münaqişənin həlli istiqamətində mühüm addım kimi qiymətləndirilib. Qeyd olunub ki, sülh planının həyata keçirilməsi Liviyada sülhün və təhlükəsizliyin bərqərar olması, həmçinin bu ölkənin suverenliyi və ərazi bütövlüyünün təmin edilməsi baxımından böyük əhəmiyyətə malikdir.
İƏT-in Baş katibi Yusif bin Əhməd əl-Osaymin də təşkilatın Qahirə Bəyannaməsinin prinsiplərini dəstəklədiyini bəyan edib.
Oqtay Bayramov
AZƏRTAC-ın xüsusi müxbiri
Qahirə
Bölmənin digər xəbərləri
