Mərakeşin Kasablanka şəhərində İslam Konfransı Təşkilatının üzvü olan ölkələrin dövlət başçılarının növbəti görüşü davam edir. Xəbər verdiyimiz kimi, Zirvə toplantısında Azərbaycan Respublikasının Prezidenti Heydər Əliyev də çıxış etmişdir.

İslam Konfransı Təşkilatının toplantısında Ermənistan-Azərbaycan münaqişəsinin aradan qaldırılmasına dair qətnamə qəbul olunmuşdur. Həmin sənəddə Ermənistanın Azərbaycana qarşı təcavüzü kəskin surətdə pislənilir, Azərbaycan Respublikasının suverenliyinə və ərazi bütövlüyünə qarşı təcavüzə son qoyulması tələb olunur, bir daha qeyd edilir ki, zor gücünə ərazi ələ keçirilməsi yolverilməzdir.