Mərakeşin Kasablanka şəhərində İslam Konfransı Təşkilatının üzvü olan ölkələrin dövlət başçılarının Zirvə toplantısı zamanı Azərbaycan Respublikasının Prezidenti Heydər Əliyev dekabrın 15-də bir sıra nümayəndə heyətlərinin rəhbərləri ilə görüşərək, işgüzar söhbətlər və danışıqlar aparmışdır. Azərbaycan dövlətinin başçısı Türkiyə Prezidenti Süleyman Dəmirəl, Malaziyanın Baş naziri Mühəmməd, Misir Prezidenti Hüsni Mübarək ilə, habelə İranın xarici işlər naziri Vilayəti ilə görüşmüşdür. İkitərəfli əməkdaşlıq, regional münaqişələrin aradan qaldırılması, respublikamızdakı ictimai-siyasi vəziyyət və digər məsələlər barəsində söhbət getmişdir.

Xəbər verdiyimiz kimi, İKT-nin Zirvə toplantısında Ermənistan-Azərbaycan münaqişəsinin aradan qaldırılmasına dair qətnamə qəbul olunmuşdur. Həmin sənəddə Ermənistanın Azərbaycana təcavüzü kəskin surətdə pislənilmiş, ölkəmizin suverenliyinə və ərazi bütövlüyünə qarşı təcavüzə son qoyulması qətiyyətlə tələb edilmişdir. Digər qətnamədə İKT üzvü olan dövlətlər Azərbaycana humanitar yardımı artırmağa çağırılır.

Əfqanıstanın Prezidenti Rəbbani Azərbaycan jurnalistləri ilə müsahibəsində bildirmişdir ki, onun ölkəsi zor gücünə ərazi ələ keçirilməsini yolverilməz sayır. O qeyd etmişdir ki, Ermənistanın təcavüzkar siyasəti heç bir ölçüyə sığmır və Azərbaycan Respublikasının suverenliyinə qarşı qəsd kimi qiymətləndirilməlidir.

İKT-nin Zirvə toplantısı dekabrın 15-də öz işini başa çatdırmışdır. Görüşün iştirakçıları Azərbaycan Respublikasının Prezidentinə böyük ehtiram göstərmişlər: onların xahişi ilə Heydər Əliyev toplantının son iclasında yekun nitqi söyləmişdir.