CƏMİYYƏT
İsmayıllıda baş verən yanğın söndürülüb, Şabranda isə məhdudlaşdırılıb
Bakı, 31 avqust, AZƏRTAC
Avqustun 30-da İsmayıllı rayonunun Keyvəndi və Şəbiyan kəndlərinin bələdiyyə ərazisində başlayan yanğının söndürülməsi məqsədilə Ekologiya və Təbii Sərvətlər Nazirliyinin (ETSN) bütün yerli qurumlarının və Fövqəladə Hallar Nazirliyinin (FHN) Dövlət Yanğından Mühafizə Xidmətinin əməkdaşları əraziyə səfərbər olunublar. Yanğın söndürülüb və meşəyə keçməsinin qarşısı alınıb.
AZƏRTAC xəbər verir ki, bunu nazirliyin mətbuat katibi İradə İbrahimova bildirib.
Nazirlik rəsmisi onu da qeyd edib ki, dünən Şabran rayonunun Çuxurəzəmi kəndi yaxınlığında, dağlıq ərazidə baş vermiş yanğın ETSN-in yerli qurumlarının 50-yə yaxın əməkdaşı və FHN-in yanğından mühafizə qüvvələri tərəfindən məhdudlaşdırılıb. Hazırda ərazidə soyutma işləri aparılır.