İsrailli ekspert: Ermənistan etnik təmizləmə aparıb və Azərbaycan ərazilərinin 20 faizini işğal edib
Bakı, 5 may, AZƏRTAC
Beynəlxalq münasibətlərin müasir mərhələsində koronavirus problemi üstünlük təşkil edir. ABŞ, Fransa, İtaliya, Böyük Britaniya kimi iqtisadi cəhətdən güclü dövlətlər həqiqətən bu virusla toqquşublar və bu gözəgörünməz dəhşətin öhdəsindən çox çətinliklə gəlirlər. Mən hələ koronavirusla yanaşı, digər ərazi və etnik münaqişələrin mövcud olduğu kiçik dövlətlərdən söhbət açmıram. BMT-nin Baş katibi Antonio Quterreşin ümumi atəşkəs elan edilməsi təşəbbüsü yalnız alqışlanmalıdır. Lakin əfsuslar olsun, BMT tarixi sübut edir ki, bu təşkilat bəyanatlardan və tövsiyə xarakterli qətnamələrdən artıq heç nəyə nail olmayıb.
AZƏRTAC xəbər verir ki, bu barədə Bakı Beynəlxalq Multikulturalizm Mərkəzinin İsraildəki nümayəndəliyinin rəhbəri, beynəlxalq münasibətlər sahəsində tanınmış israilli ekspert Arye Qut İsrailin Doqquzuncu televiziya kanalının “Gün” informasiya-analitik verilişində bildirib.
İsrailli ekspertin sözlərinə görə, koronavirus pandemiyası dövründə elə təəssürat yaranıb ki, sanki bütün terrorçular və separatçılar bu gün karantinə gedib və koronavirusla mübarizə aparırlar. “Bu reallıq aldadıcıdır. Gəlin, elə postsovet məkanında ən köhnə və dondurulmuş münaqişəni - Ermənistan-Azərbaycan Dağlıq Qarabağ münaqişəsini götürək. Bu münaqişə nəticəsində Ermənistan etnik təmizləmə aparıb və Azərbaycan ərazilərinin 20 faizini işğal edib. Dağlıq Qarabağdan əlavə ona bitişik daha yeddi Azərbaycan rayonu da işğal edilib.
Erməni təcavüzü nəticəsində bu gün Azərbaycanda bir milyon qaçqın və məcburi köçkün var. Təsəvvür edin, uzun illərdir həll olunmamış ərazi və etnik münaqişə ilə yaşayan Azərbaycan bu gün bu qorxulu pandemiyaya müqavimət göstərməlidir. Azərbaycan rəhbərliyinin bu virusa qarşı apardığı səmərəli və layiqli mübarizəni qeyd etmək və vurğulamaq istəyirəm. İndiyədək ölkədə 2 minədək insan koronavirusa yoluxub və 25 nəfər bu xəstəlikdən dünyasını dəyişib”, - deyə Arye Qut qeyd edir.
Ekspert vurğulayır ki, Azərbaycan İsrail turistləri üçün ən cazibəli yerlərdən biri olub və olacaq. “Müasir mərhələdə İsrail ilə Azərbaycan arasında əməkdaşlıq və tərəfdaşlıqda dostluq və etimad telləri dünyanın əksər ölkələri üçün əsl və həqiqi modeldir. Ən çətin günlərdə bu ölkələr həmişə yanaşıdırlar və qarşılıqlı dəstəyi daim hiss edirlər. İsrail turistləri Azərbaycana daim böyük məmnuniyyətlə səfər edirlər. Ötən il Odlar Diyarını 60 mindən çox israilli turist ziyarət edib. Azərbaycan multikulturalizm və tolerantlıq ölkəsidir. Azərbaycanın yəhudi icması Azərbaycan cəmiyyətinin ayrılmaz hissəsini təşkil edir”, - deyə Arye Qut İsrailin Doqquzuncu televiziya kanalının canlı yayımlanan “Gün” informasiya-analitik verilişində çıxış edərkən vurğulayıb.
Ermənistan-Azərbaycan Dağlıq Qarabağ münaqişəsi mövzusunu davam etdirən israilli ekspert BMT rəhbərinin bəyanatını yüksək dəyərləndirdiyini deyib. “Lakin bu bəyanatın reallığına necə inanmaq olar ki, dünya birliyinin qorxulu pandemiyaya qarşı fəal və aqressiv mübarizə apardığı bir vaxtda Ermənistan Respublikası Azərbaycanın beynəlxalq səviyyədə tanınmış ərazisi olan Dağlıq Qarabağın oyuncaq və separatçı rejimindən istifadə edərək işğal olunmuş ərazilərdə 2020-ci il martın 31-də qeyri-legitim və qondarma “parlament və prezident seçkiləri” keçirib. Məntiqi və ritorik sual meydana çıxır: “Bu şou-seçkilər indi kimə lazımdır?” Bu qeyri-legitim seçkiləri Aİ, BMT və ATƏT kimi beynəlxalq qurumlar qəbul etməyiblər. Hamıya gün kimi aydındır ki, bu qeyri-legitim seçkilərin yekunlarının heç bir hüquqi nəticəsi yoxdur və beynəlxalq hüququn başlıca norma və prinsipləri ilə ziddiyyət təşkil edir”, - deyə Arye Qut qeyd edir.
Biz bu gün beynəlxalq birliyin pandemiya ilə mübarizədə ümumi səylərini, Avropanın həmrəyliyini, dövlət başçılarının videokonfranslar apardığını görürük.
“Aprelin əvvəlində Azərbaycan Respublikasının Prezidenti, Türkdilli Dövlətlərin Əməkdaşlıq Şurasının sədri İlham Əliyevin təşəbbüsü ilə Türk Şurasının videokonfrans vasitəsilə fövqəladə sammiti təşkil olundu. Bu gün biz yeni “Zoom” diplomatiyasının şahidlərinə çevrilirik. İsrailin Baş Naziri xarici dövlətlərin başçıları ilə daim videokonfranslar keçirir. Yeni reallıqlar diplomatları distant işin yeni vasitələri və beynəlxalq qarşılıqlı fəaliyyətin yeni formatı ilə üz-üzə qoyub. Qlobal karantin şəraitində diplomatik fəaliyyət ilk dəfə baş verir və adekvat hazırlıq tələb edir. Tarixdə ilk dəfə olaraq sosial şəbəkələr və onlayn-platformalar beynəlxalq əməkdaşlığın köməkçi alətindən əsas alətinə çevrilib. Beləliklə, konfrans salonlarından onlayn-məkanlara sürətli keçid müntəzəm dialoq və operativ məlumat mübadiləsi imkanlarını genişləndirib”, - deyə Bakı Beynəlxalq Multikulturalizm Mərkəzinin İsraildəki nümayəndəliyinin rəhbəri, beynəlxalq münasibətlər sahəsində tanınmış israilli ekspert Arye Qut İsrailin Doqquzuncu televiziya kanalının birbaşa yayımlanan “Gün” informasiya-analitik verilişində bildirib.
Bölmənin digər xəbərləri
