İsveç enerji şirkəti PFAS-ın ölçülməsi üçün yeni metodu sınaqdan keçirir
Stokholm, 10 oktyabr, Nərgiz Cəfərli, AZƏRTAC
İsveçin “Umeå Energi” enerji şirkəti tullantıların yandırılması nəticəsində yaranan tüstü qazlarında PFAS-ın ölçülməsi üçün yeni üsulları sınaqdan keçirməyə başlayıb.
AZƏRTAC xəbər verir ki, sınaqlar Ətraf Mühitin Mühafizəsi Agentliyi və İsveç Ətraf Mühit İnstitutu ilə əməkdaşlıq çərçivəsində həyata keçirilir.
PFAS - paltardan tutmuş mətbəx qablarına qədər minlərlə gündəlik məhsulda istifadə olunan perfluoralkil və polifluoroalkill kimyəvi birləşmələrdir, təbiətdə parçalanmır və sağlamlıq üçün təhlükə yarada bilər.
Umeo Universiteti ilə əməkdaşlıqda aparılan araşdırmalar göstərdi ki, məişət tullantılarından PFAS yüksək temperaturlara qarşı davamlı ola bilər və tullantıların yandırılması qalıqları vasitəsilə ətraf mühitə yayıla bilər.
PFAS problemi qlobal xarakter daşıyır - bu maddələrin izləri bütün dünyada heyvanlarda və insanlarda aşkar edilib.
PFAS emissiyalarının ölçülməsi üsullarının işlənib hazırlanması onların yayılması ilə mübarizədə əsas addım ola bilər və gələcəkdə bu təhlükəli maddələrdən ətraf mühitin çirklənməsinə effektiv nəzarət etməyə və onu azaltmağa imkan verəcək.
Bölmənin digər xəbərləri
