İsveçdəki Azərbaycan diasporunun nümayəndələri VII Yay Düşərgəsi ilə bağlı təəssüratlarını bölüşüblər
Stokholm, 12 avqust, AZƏRTAC
Xəbər verildiyi kimi, Diasporla İş üzrə Dövlət Komitəsi və Heydər Əliyev Fondunun birgə təşkilatçılığı ilə avqustun 2-dən 8-dək Şərqi Zəngəzurun dilbər guşəsi olan Zəngilanda Diaspor Gənclərinin VII Yay Düşərgəsi keçirilib. “Şəhərsalma və Memarlıq İli” çərçivəsində “Dirçələn şəhərlər” şüarı ilə Şərqi Zəngəzurda keçirilən Yay Düşərgəsində 64 ölkədən 123 diaspor gənci və ölkəmizi sevən xarici vətəndaş iştirak edib. Onların arasında İsveçdəki Azərbaycan diasporunun üç üzvü – bu ölkənin aparıcı universitetlərində təhsil alan gənclər də olublar. Azərbaycanlı gənclər Yay Düşərgəsində iştirakla bağlı təəssüratlarını AZƏRTAC ilə bölüşüblər.
Gülnisə İbrahimova: Diaspor Gənclərinin VII Yay Düşərgəsində iştirak etmək mənim üçün təkcə çox maraqlı deyil, həm də həqiqətən mənalı təcrübə oldu. Düşərgə zamanı Zəngilana və şəhərsalma məsələlərinə həsr olunmuş müxtəlif proqramlarda iştirak etdik, Laçında bir gecə keçirdik ki, bu da bizə Qarabağın müxtəlif guşələrini daha yaxşı tanımaq imkanı verdi.
Həmin həftə ərzində Azərbaycanın bir çox ictimai xadimi ilə də görüşdük, Qarabağın tarixi və inkişaf perspektivləri haqqında biliklər əldə etdik. Amma ən əsası, biz nəzəriyyə ilə məhdudlaşmadıq; Qarabağı əyani şəkildə görə bildik, onun ab-havasını və gözəlliyini hiss etdik.
Düşərgə əsnasında Şuşaya, Cıdır düzü yaylasına, Xudafərin körpüsünə, Qarabağın və Şərqi Zəngəzurun digər tarixi və təbiət abidələrinə baş çəkdik. Həmçinin Qarabağ Universitetində olduq və bu ali təhsil müəssisəsinin fəaliyyəti, gələcək planları və bölgənin inkişafında oynayacağı rol haqqında məlumat əldə etdik.
Ən çox təəssürat doğuran təcrübələrdən biri şəhid ailələri ilə görüşümüz oldu. Doğma torpaqlarını azad etmək üçün canlarını fəda edən şəhidlərin yaxınlarının xatirələri bizə dərin təsir bağışladı. Mənim üçün bu görüş əsl həyat dərsi oldu və uzun müddət yaddaşımda qalacaq.
Daha bir vacib məqam Azərbaycanı xaricdə ən yaxşı şəkildə təmsil etməklə, mədəniyyətimizin, tariximizin və görməli yerlərimizin təbliği ilə bağlı yeni biliklər qazanmağımız idi. Əminəm ki, düşərgədə qazandığım təcrübə bu sahədə gələcək səylərimdə mənə çox kömək edəcək.
Düşərgə mənə təkcə gözəl xatirələr və yeni dostlar qazandırmadı, həm də özümlə gələcək üçün bir çox dəyərli ideyalar götürdüm.
“Azərbaycanın İsveçdə təhsil alan tələbələri və məzunları” ictimai birliyinin (SSANA) vitse- prezidenti Fidan Əhmədli isə qeyd edib ki, Diaspor Gənclərinin VII Yay Düşərgəsi gənc azərbaycanlılar üçün ölkəmizi daha yaxşı tanımaq və dünyanın hər yerində yaşayan həmvətənlərlə görüşmək üçün unikal fürsət olub.
O deyib: “Düşərgənin proqramı çox əhatəli idi. Laçın, Cəbrayıl, Şuşa, Zəngilan və Xankəndini ziyarət etdik ki, bu da ölkəmizin tarixini daha yaxından öyrənməyə imkan verdi. Qarabağ Universitetinə səfər xüsusilə maraqlı oldu, burada onun fəaliyyəti və tələbələrə təqdim etdiyi imkanlar haqqında məlumat əldə etdik. Bir hüquqşünas olaraq, Qarabağda ən müasir təhsil imkanları təklif edən yeni universitetin inkişafını böyük maraqla izlədim.
Düşərgənin ən emosional məqamlarından biri şəhid anaları ilə görüş idi. Onların hekayələrini dinləmək, ağrılarını və inanılmaz dözümlülüklərini görmək həm çətin, həm də inanılmaz dərəcədə ilhamverici idi. Hərbçilərlə görüş də mənalı oldu. Bu insanların Vətənə xidmətləri haqqında eşitmək və onlarla şəxsən ünsiyyət qurmaq fürsəti bizdə dərin qürur və minnətdarlıq hissi yaratdı.
Düşərgənin ən yaddaqalan tədbirlərindən biri də dünyada məşhur fotojurnalist Reza Deqatinin təqdimatı oldu. O, bizə təkcə fotoşəkillərini göstərmədi, həm də hər bir şəklin arxasındakı hekayələri danışdı, şahidi olduğu hadisələrlə bağlı xatirələrini bölüşdü. Bəzən tək bir fotoşəkil min sözdən daha çox şey ifadə edə bilər. Onun təqdimatı zamanı məhz bunu hiss etdik. Bu fotoşəkillərin arxasındakı əsl hekayələri eşitmək məndə güclü və unudulmaz təəssürat yaratdı.
Bütün bu görüşlər və səfərlər düşərgəni mənim üçün adi sosial layihədən daha mənalı tədbirə, dərin mənəvi təcrübəyə çevirdi. Əminəm ki, orada keçirdiyimiz hər gün Vətənə olan sevgimizi və vətənpərvərliyimizi daha da gücləndirdi. Bundan əlavə, düşərgə bizə əsl dostlar və yeni peşəkar əlaqələr qazandırdı. Dünyanın hər yerində yaşayan azərbaycanlılarla görüşmək və Azərbaycanın ən gözəl guşələrindən biri olan Qarabağa səyahət etmək mənim üçün həqiqətən də əvəzsiz hədiyyə oldu”.
İsveçdəki Azərbaycan diasporunda gənclərin əlaqələndiricisi Məsumə Rüstəmli də təəssüratlarını bölüşüb: “Diaspor Gənclərinin VII Yay Düşərgəsi çərçivəsində Laçında keçirilən panel diskussiyasında iştirak etmək mənim üçün böyük şərəf və sevinc idi.
Paneldə Azərbaycan diasporu gənclərinin fəaliyyəti, məqsədlərimiz və gələcək planlarımız müzakirə edildi. Ötən ilin dekabr ayından bəri həyata keçirilən layihələr və tədbirləri təqdim etdik, həmçinin İsveçdə və müxtəlif ölkələrdə fəaliyyətimiz barədə danışdıq.
Diaspor gənclərinin əsas məqsədi xaricdə yaşayan gənc azərbaycanlıları birləşdirmək, onların Azərbaycanla əlaqələrini gücləndirmək, milli və mədəni dəyərləri qorumaq, yaşadığımız dövlətlərdə ölkəmizi layiqincə təmsil etməkdir.
Panel diskussiyası zamanı, həmçinin hansı ölkədə yaşamağımızdan asılı olmayaraq, gəncləri bir-biri ilə əlaqələri möhkəmləndirməyə, qarşılıqlı dəstəyə və birlikdə çalışmağa çağırdıq. Axı gücümüz məhz birlikdədir.
Dünyanın hər yerindən olan gənc azərbaycanlılarla yanaşı, doğma torpağımızda, Laçında fəaliyyətimizin nəticələrini təqdim etmək məndə xüsusilə şərəfli və unudulmaz təəssürat doğurdu. Bu təcrübə mənim üçün böyük qürur mənbəyinə çevrildi və illər boyu yaddaşımda həkk olunacaq.
Bölmənin digər xəbərləri
