İsveçli baş məşqçi Azərbaycan millisini ciddi və iddialı rəqib adlandırıb

15.11.2023 [16:43]
Çap et
A⁺ A^-

Bakı, 15 noyabr, AZƏRTAC

"Sabah bizi çətin rəqiblə oyun gözləyir".

AZƏRTAC xəbər verir ki, bu sözləri futbol üzrə İsveç millisinin baş məşqçisi Yanne Andersson AVRO-2024-ün seçmə mərhələsində Bakıda Azərbaycan yığmasına qarşı keçirəcəkləri oyundan əvvəl mətbuat konfransında deyib.

61 yaşlı isveçli mütəxəssis millimizin iddialı komanda olduğunu bildirib: “Belçika kimi, Azərbaycan da bizə görə iddialı rəqibdir. Sabahkı oyunda müsbət nəticə üçün çalışacağıq".

İsveçin "Hekken" klubunun Avropa Liqasında "Qarabağ"a qarşı keçirəcəyi matç barədə də danışan Y. Andersson əlavə edib: “Qarabağ” güclü komandadır, yaxşı çıxış edir. İnanıram ki, İsveç təmsilçisi də meydanda öz gücünü göstərə biləcək".

Qeyd edək ki, noyabrın 16-da Tofiq Bəhramov adına Respublika Stadionunda keçiriləcək Azərbaycan - İsveç görüşü saat 21:00-da start götürəcək.