İtaliyada səhiyyə işçisi “saxta qolla” peyvənd olunmağa cəhd edib
Roma, 4 dekabr, AZƏRTAC
İtaliyanın şimalındakı Biella qəsəbəsində səhiyyə işçisi “saxta qolla” peyvənd olunmağa cəhd edib.
AZƏRTAC xəbər verir ki, peyvəndin əleyhinə olan 50 yaşlı diş həkimi vaksinasiya mərkəzinə gedərək lazımi sənədləri hazırlayıb. Ona peyvənd tətbiq etməyə hazırlaşan tibb bacısı kişinin qolunda dəri rənginin fərqli olduğunu görüb və ona peyvənd vurmayıb. Daha sonra məlum olub ki, həmin şəxsin silikondan hazırlanmış “saxta qolla” peyvənd olunmaq niyyəti olub.
Hadisədən sonra işdən çıxarılan diş həkimi barəsində dələduzluq faktı ilə polisə şikayət edilib.
Xatırladaq ki, hazırda İtaliyada peyvənd olunan, xəstəliyi keçirib immunitet qazanan və ya COVID-19 testinin nəticəsi mənfi olanlara vaksinasiya sertifikatı verilir. Lakin dekabrın 6-dan yanvarın 15-dək testdən keçmək bu sertifikatı əldə etmək üçün kifayət etməyəcək. “Super yaşıl keçid kartı” adlandırılan bu qaydalar çərçivəsində vaksinasiya sertifikatı yalnız peyvənd olunmuş və ya xəstəlikdən sağalmış şəxslərə veriləcək.
Qeyd edək ki, İtaliyada 12 yaşdan yuxarı əhalinin 87,5 faizi ən azı bir doza peyvənd olunub.
Nihad Budaqov
AZƏRTAC-ın xüsusi müxbiri
Roma
Bölmənin digər xəbərləri
