İyulun 1-dən Misir əcnəbi turistləri qəbul edəcək
Qahirə, 11 iyun, AZƏRTAC
Misirin Nazirlər Kabineti bildirib ki, iyulun 1-dən etibarən bu ölkə beynəlxalq aviareysləri və əcnəbi turistləri qəbul edəcək.
AZƏRTAC xəbər verir ki, Cənubi Sinayda Şarm əl-Şeyx kurortunda, Qırmızı dəniz bölgəsindəki Dahab, Hurhaqa və Marsa Alam istirahət məkanlarında otellər öz fəaliyyətini bərpa edəcəklər.
Ümumi daxili məhsulunun 5 faizini turizm təşkil etdiyi Misir bu sektorun fəaliyyətini, habelə beynəlxalq uçuşları martdan dayandırıb. Bu ölkə üç ay ərzində turizm sektorunun iflic olmasından 3 milyard dollara yaxın vəsait itirib. Misirin Turizm və Səhiyyə nazirlikləri kurort məkanlarında yerləşən otellərin dezinfeksiyasına ciddi nəzarət edir. Onların hər birinə yeni təhlükəsizlik sertifikatları təqdim edilir. Bundan başqa, ölkənin beynəlxalq aeroportlarında da COVID-19 virusuna qarşı profilaktik tədbirlər həyata keçirilir. Artıq Ukrayna, Belarus və İtaliyanın turizm şirkətləri turistləri göndərmək üçün Misirin Turizm Nazirliyinə müraciət ediblər.
Qeyd edək ki, ötən ilin iyul-avqust aylarında Bakıdan Şarm əl-Şeyxə birbaşa həftəlik uçuşlar həyata keçirilib.
Oqtay Bayramov
AZƏRTAC-ın xüsusi müxbiri
Qahirə
Bölmənin digər xəbərləri
