İYULUN 21-DƏN BAKI-QARS TƏYYARƏ REYSLƏRİ İLƏ UÇUŞLAR BAŞLAYACAQDIR
AZƏRTAC-ın xüsusi müxbiri xəbər verir ki, iyulun 21-dən Bakı-Qars təyyarə reysləri ilə uçuşlar həyata keçirilməyə başlayacaqdır. Bu barədə jurnalistlərə məlumat verən Azərbaycanın Qarsdakı baş konsulu Həsən Zeynalov bildirmişdir ki, Bakıdan gələn ilk təyyarə həmin gün səhər saat 07.45-də Qars şəhərinin hava limanına enəcəkdir.
Baş konsul onu da əlavə etmişdir ki, Qarsa enəcək ilk təyyarədə hökumət nümayəndələri, diplomatlar, elm xadimləri, jurnalistlər, şair və yazıçılardan ibarət nümayəndə heyəti olacaqdır. Bu münasibətlə hava limanında mərasim təşkil olunacaqdır. Beləliklə, Bakıdan gələn təyyarə ilə Qarsa ilk beynəlxalq uçuş həyata keçirilmiş olacaqdır.
Qarslılar vilayətin həyatında bu əlamətdar hadisə ilə bağlı baş konsula öz minnətdarlıqlarını bildirmişlər. Uçuşlar həm onların Bakıdakı qohumları ilə görüşlərini asanlaşdıracaq, həm də ticarət əlaqələrinə təkan verəcəkdir.
