“Kapital Bank” və Təhsilin İnkişafı Fondu ilə Milli Aviasiya Akademiyasının əməkdaşlığı davam edəcək
Bakı, 5 fevral, AZƏRTAC
“Kapital Bank” ilə imzalanan Anlaşma Memorandumu çərçivəsində həyata keçirilən “Tələbə+” layihəsi bizim üçün mühüm əhəmiyyət kəsb edir. Bu layihəyə qoşulmaqla bir sıra prosesləri optimallaşdırır, əvvəllər ayrı-ayrılıqda görülən işləri artıq mərkəzləşdirilmiş şəkildə icra etmək imkanı əldə edirik. Sözügedən kart həm giriş-çıxış sistemini təmin edəcək, həm tələbə kartı funksiyasını daşıyacaq, eyni zamanda, tələbələr bu kart vasitəsilə təqaüdlərini ala biləcəklər. Bildiyimiz kimi, kart sahibləri “Kapital Bank”ın tərəfdaş şəbəkəsi çərçivəsində müəyyən endirim və üstünlüklərdən də yararlana biləcəklər.
Bu sözləri AZƏRTAC-a açıqlaması zamanı Milli Aviasiya Akademiyasının prorektoru Gülnarə Əhmədova deyib.
Onun sözlərinə görə, hazırda Milli Aviasiya Akademiyasında “Kapital Bank”ın 5 nəfər əməkdaşı pedaqoji fəaliyyətlə məşğuldur və cari ilin əvvəlində bank əməkdaşları tərəfindən tələbə, müəllimlər üçün silsilə seminarlar təşkil edilib.
“Kapital Bank” ölkəmizin aparıcı banklarından biri olduğundan tələbələrimizin bu qurumda təcrübə keçməsi, eyni zamanda, bankın qabaqcıl mütəxəssislərinin akademiyada pedaqoji, elmi-təcrübə fəaliyyətində iştirakı bizim üçün xüsusi maraq və əhəmiyyət kəsb edir. Təhsilin İnkişafı Fondu ilə bir sıra uğurlu layihələr həyata keçirilib. Belə ki, tələbələrimiz “Zərif mühəndislər” təqaüd proqramı, “4Sİ Akademiyası – Milli Proqram”, “Maarifçi” tələbə–məzun təcrübə proqramı, “Qırmızı Ürəklər” Təhsil Təqaüd Proqramı, “Parla” təqaüd və inkişaf proqramların iştirakçısı və ya qalibi olublar. Eyni zamanda, Təhsilin İnkişafı Fondu ilə Milli Aviasiya Akademiyası arasında bağlanmış “Universitetlərin elmi-pedaqoji heyət üzvləri və təhsilalanlarının IELTS imtahanına təşviq edilməsi” ilə bağlı müqaviləyə əsasən, 18 nəfər bakalavr IELTS imtahanı üzrə ödənişdən tam azad olunub, əlavə olaraq 7 nəfər üçün də ödənişdən azadolma məqsədilə müraciət məktubu təqdim edilib. Ümid edirik ki, “Kapital Bank” və Təhsilin İnkişafı Fondu ilə imzalanmış bu yeni Anlaşma Memorandumu çərçivəsində əməkdaşlığımız daha da möhkəmlənəcək və qarşılıqlı faydalı layihələrin sayı artacaq”, - deyə G.Əhmədova əlavə edib.
Bölmənin digər xəbərləri
