KƏLBƏCƏR RAYON İCRA HAKİMİYYƏTİNİN BAŞÇISI VİDADİ MƏHƏRRƏMOVUN ÇIXIŞI
-Zati-aliləri möhtərəm cənab Prezident!
Sizin rəhbərliyiniz altında ölkəmizdə quruculuq və abadlıq işləri geniş vüsət almışdır. Azərbaycan dünyada analoqu olmayan sürətlə inkişaf edir və bölgənin ən qüdrətli lider dövlətinə çevrilmişdir. Bütün bunlar əsası ümummilli liderimiz Heydər Əliyev tərəfindən qoyulmuş sosial-iqtisadi islahatların Sizin tərəfinizdən uğurla davam etdirilməsi nəticəsində mümkün olmuşdur. Bu tarixi nailiyyətlər hamımızda qürur və iftixar hissi doğurur.
Ulu öndər Heydər Əliyevin qaçqın və məcburi köçkünlərin sosial müdafiəsinin gücləndirilməsi, mənzil-məişət şəraitinin yaxşılaşdırılması, məşğulluğunun təmin edilməsi istiqamətində strateji xəttini Siz uğurla davam etdirirsiniz.
Artıq çadır düşərgələrinin ləğvi başa çatmaq üzrədir. Onların əvəzində yeni, bütün sosial infrastruktura malik müasir qəsəbələr tikilərək, məcburi köçkünlərin istifadəsinə verilir. Onlar istifadə etdikləri kommunal xidmət haqqını, dövlət ali və orta ixtisas təhsili müəssisələrində ödənişli formada təhsil alan məcburi köçkünlər isə təhsil haqqını ödəməkdən azad edilmişlər. Məcburi köçkünlərə verilən aylıq yemək xərci üçün müavinətin miqdarı, qış aylarında verilən ağ neftin həcmi xeyli artırılmışdır.
Həmçinin büdcədən maliyyələşdirilən müəssisələrdə, təşkilatlarda çalışmış, özlərindən asılı olmayan səbəblərə görə iş yerlərindən məhrum olmuş və işlə təmin edilməmiş məcburi köçkünlərə orta aylıq əmək haqqının ödənilməsi davam etdirilir. Məcburi köçkünlərə yemək xərci üçün verilən aylıq müavinətlər, pensiyalar, habelə büdcədən maliyyələşən müəssisələrdə çalışan işçilərin əmək haqları plastik kartlarla bankomatlar vasitəsilə ödənilir. Bütün bunlar soydaşlarımıza göstərilən davamlı dövlət qayğısı, Sizin qayğınızdır.
Möhtərəm cənab Prezident!
Bütün Azərbaycan xalqı kimi, rayonumuzun əhalisi də Sizə ürəkdən inanır və qəti əmindir ki, apardığınız sülh siyasəti mütləq qalib gələcək, işğal altında olan torpaqlarımız azad ediləcəkdir.
Lakin Ermənistanın tutduğu qeyri-konstruktiv mövqe nəticəsində münaqişənin həlli qəsdən yubadılır, müxtəlif bəhanələr gətirilməklə, təbii sərvətləri ilə zəngin olan Kəlbəcəri və digər işğal olunmuş torpaqlarımızı geri qaytarmaq istəmirlər. Ancaq vaxt ermənilərin xeyrinə işləmir. Gec-tez onlar bizim dövlətimizin iqtisadi qüdrəti, hərbi gücü qarşısında tab gətirə bilməyəcəklər. Biz inanırıq ki, Siz heç vaxt Azərbaycan torpaqlarında ikinci erməni dövlətinin yaradılmasına imkan verməyəcəksiniz.
Yeri gəlmişkən, məlumat vermək istəyirəm ki, digər məcburi köçkünlər kimi, kəlbəcərlilər də ata-baba torpaqlarının erməni silahlı qüvvələri tərəfindən zəbt olunması ilə heç vaxt barışmırlar. Bunun nəticəsidir ki, son illər hərbçi ixtisasına yiyələnmək, Vətənin müdafiəsində bilavasitə yaxından iştirak etmək istəyənlərin sayı çoxalır. Təkcə cari ildə Cəmşid Naxçıvanski adına hərbi liseyə kəlbəcərlilərdən 10 nəfər qəbul olunmuşdur.
Möhtərəm cənab Prezident!
Mənə verdiyiniz fürsətdən istifadə edərək, bəzi problemləri də Sizin diqqətinizə çatdırmaq istəyirəm. Ermənistanın hərbi təcavüzü nəticəsində öz ata-baba yurdlarından didərgin düşmüş və respublikamızın 56 şəhər və rayonunda, 707 yaşayış məntəqəsində müvəqqəti məskunlaşmış, xüsusilə yataqxanalarda, ictimai binalarda sığınacaq tapmış soydaşlarımızın mənzil şəraitinin yaxşılaşdırılması istiqamətində apardığınız işin, verilmiş tapşırıqlarınızın sonadək davam etdirilməsi kəlbəcərlilərin arzusudur.
Xanlar rayonu ərazisində müvəqqəti məskunlaşmış 500 məcburi köçkün ailəsi üçün həmin rayonda qəsəbənin salınması məqsədi ilə artıq 40 hektar torpaq sahəsi ayrılmışdır. Lakin həmin qəsəbənin salınması ləngidilir.
Zati-aliləri möhtərəm cənab Prezident!
Ölkəmizin həyatında baş vermiş bütün ictimai-siyasi proseslərdə kəlbəcərlilər həmişə Sizi dəstəkləmişlər və xalqımızın ümummilli lideri Heydər Əliyevin siyasi xəttinə və Sizə bundan sonra da sadiq olacaqlar.
Bölmənin digər xəbərləri
