KƏLBƏCƏRLİLƏR ÖLKƏ BAŞÇISININ SİYASƏTİNİ DƏSTƏKLƏYİRLƏR
Kəlbəcərin işğalından 13 il keçir. O faciəli günləri bir daha yada salmaq məqsədi ilə keçirilən anma mərasiminə toplaşan rayon sakinləri əvvəlcə rayonun müdafiəsi zamanı şəhid olmuş həmyerlilərinin xatirəsini ehtiramla yad etmişlər. Sonra rayon icra hakimiyyətinin başçısı Sahib Əkbərovun AXCP-Müsavat hakimiyyəti dövründə vəzifə uğrunda gedən çəkişmələrdən, bunun da nəticəsində ölkədə yaranmış anarxiyadan istifadə edərək, digər rayonlar kimi, Kəlbəcəri də işğal edən ermənilərin vəhşiliyindən bəhs edən məruzəsi dinlənilmişdir. Qeyd olunmuşdur ki, işğal nəticəsində 50 min nəfərdən çox kəlbəcərli respublikamızın 56 rayonuna səpələnərək, müvəqqəti sığınacaq tapmışdır. 541 nəfər şəhid olmuş, 321 nəfər isə girov götürülmüşdür. 125 nəfər rayon sakininin taleyindən isə hələ də xəbər yoxdur. Rayonun işğalı zamanı 100 min başdan çox qaramal, 500 min baş davar, 50 min arı ailəsi Ermənistana aparılmışdır.
Mərasimdə çıxış edən rayon ağsaqqalları, ziyalılar həmin dəhşətli günləri bir daha xatırlayaraq, faciənin günahkarlarını lənətləmiş və Respublika Prezidenti İlham Əliyevin apardığı məqsədyönlü siyasət nəticəsində tezliklə dədə-baba torpaqlarına qayıdacaqlarına əmin olduqlarını bildirmişlər. Axırda mərasim iştirakçıları beynəlxalq təşkilatlara və ölkəmizdə fəaliyyət göstərən xarici səfirliklərə müraciət qəbul etmişlər.
Bölmənin digər xəbərləri
