KƏND TƏSƏRRÜFATI MƏHSULLARININ NOVRUZ YARMARKASI KEÇİRİLMİŞDİR
AZƏRTAC xəbər verir ki, martın 16-da Bakı şəhərində Novruz bayramı ilə əlaqədar kənd təsərrüfatı məhsullarının satış-yarmarkaları keçirilmişdir.
Kənd Təsərrüfatı və İqtisadi İnkişaf nazirliklərinin, Bakı Şəhər İcra Hakimiyyətinin birgə keçirdikləri yarmarkalar şəhərin rayonlarında, quş əti və yumurta yarmarkası isə “Təzə bazar”, 3-cü mikrorayon və Sabunçu bazarlarında təşkil olunmuşdu. Xatırladaq ki, əhalinin kənd təsərrüfatı məhsullarına artan tələbatı nəzərə alınaraq yarmarkalar bayram günlərində də fəaliyyət göstərəcəkdir.
“Təzə bazar” MMC-nin həyətindəki yarmarkada əhaliyə geniş çeşiddə meyvə, tərəvəz, ət məhsulları, yumurta, çərəz təklif olunurdu.
Kənd Təsərrüfatı Nazirliyinin şöbə müdiri İslam İbarahimovun sözlərinə görə, Novruz bayramı ilə əlaqədar 4 gün müddətində əhaliyə geniş çeşiddə məhsullar satılacaqdır. Bir çox məhsulların qiyməti bazardakından 15-20 faiz, bəzilərininki isə hətta 30-40 faiz ucuzdur. Məqsəd şəhər əhalisini münasib qiymətlərə lazımi məhsullarla təmin etməkdir. Yeri gəlmişkən, 4 gün ərzində yarmarkalara 600 tona yaxın məhsul gətiriləcəkdir.
Bölmənin digər xəbərləri
