KƏND TƏSƏRRÜFATI NAZİRLİYİ ŞƏKİDƏ ZONA SEMİNAR-MÜŞAVİRƏSİ KEÇİRMİŞDİR
AZƏRTAC-ın müxbiri xəbər verir ki, Kənd Təsərrüfatı Nazirliyi martın 6-da Şəki Şəhər İcra Hakimiyyətində Azərbaycan Respublikası Prezidentinin “Kənd təsərrüfatı məhsulları istehsalçılarına dövlət dəstəyi haqqında” 2007-ci il 23 yanvar tarixli Sərəncamından irəli gələn məsələlərə həsr olunmuş zona seminar-müşavirəsi keçirmişdir. Müşavirədə Balakən, Zaqatala, Qax, Şəki və Oğuz rayonları icra hakimiyyəti aparatlarının aqrar məsələlər şöbələrinin rəhbərləri, kənd icra nümayəndəlikləri və bələdiyyə qurumlarının nümayəndələri, aqrar sahədə çalışan mütəxəssislər, fermerlər iştirak etmişlər.
Seminar-müşavirəni Şəki Şəhər İcra Hakimiyyətinin başçısı Nazim İbrahimov açmışdır. Kənd təsərrüfatı nazirinin müavini İlham Quliyev Prezident Sərəncamından və onun icrası ilə əlaqədar Nazirlər Kabinetinin 2007-ci il 15 fevral tarixli qərarından irəli gələn məsələlərlə bağlı geniş məruzə etmişdir.
Məruzəçi müstəqil Azərbaycanın memarı və qurucusu, ümummilli liderimiz Heydər Əliyevin başladığı məqsədyönlü siyasətin Prezident İlham Əliyev tərəfindən uğurla davam etdirildiyini, Azərbaycanın iqtisadi inkişaf baxımından 2006-cı ildə də dünyada lider mövqeyini qoruyub saxladığını xatırlatmış, neft sektorundan daxil olan vəsaitlər və büdcə gəlirləri artdıqca, digər sahələrlə yanaşı, aqrar sektora olan diqqət və qayğının daha da gücləndiyini xüsusi vurğulamışdır. Bildirilmişdir ki, istehsalçıları kənd təsərrüfatı texnikası və mineral gübrələrlə təmin etmək məqsədi ilə “Aqrolizinq” Açıq Səhmdar Cəmiyyətinə 2005 və 2006-cı illərdə dövlət büdcəsindən ümumilikdə 50 milyon manat vəsait ayrılmışdır. Bundan əlavə, mineral gübrələrin alınması üçün 2005 və 2006-cı illərdə dövlət büdcəsindən əlavə olaraq 15 milyon manat vəsait ayrılmışdır.
Məruzəçi demişdir ki, aqrar bölmənin inkişafı ilə bağlı məsələ yanvarın 22-də Prezident İlham Əliyevin sədrliyi ilə Nazirlər Kabinetinin 2006-cı ilin sosial-iqtisadi yekunlarına və 2007-ci ildə qarşıda duran vəzifələrə həsr olunmuş iclasında da geniş müzakirə edilmiş, ertəsi gün dövlət başçısı “Kənd təsərrüfatı məhsulları istehsalçılarına dövlət dəstəyi haqqında” Sərəncam imzalamışdır. Sərəncama əsasən, kənd təsərrüfatı məhsulları istehsalının səmərəsini artırmaq və həmin məhsulların istehsalçılarına dövlət tərəfindən maliyyə yardımının göstərilməsini təmin etmək məqsədi ilə məhsul istehsalçılarının məhsul istehsalı üçün istifadə etdikləri yanacağın, motor yağlarının və mineral gübrələrin dəyərinin orta hesabla 50 faizinin dövlət tərəfindən ödənilməsini təmin etmək üçün 2007-ci ilin dövlət büdcəsindən 80 milyon manat vəsait ayrılmışdır.
Sərəncamın icrası ilə əlaqədar Nazirlər Kabineti bu il fevralın 15-də müvafiq qərarla “Kənd təsərrüfatı məhsullarının istehsalçılarına əkin sahəsinin becərilməsində istifadə etdiyi yanacaq və motor yağlarına görə dövlət büdcəsinin vəsaiti hesabına yardım verilməsi Qaydaları”nı və “Aqrolizinq” Açıq Səhmdar Cəmiyyəti və digər hüquqi və fiziki şəxslər tərəfindən kənd təsərrüfatı məhsullarının istehsalçılarına mineral gübrələrin güzəştlə satılması Qaydaları”nı təsdiq etmişdir. Qərara əsasən, kənd təsərrüfatı məhsulları istehsalı üçün sərf olunan yanacaq və motor yağlarının dəyərinin orta hesabla 50 faizinin dövlət tərəfindən ödənilməsini təmin etmək üçün dövlət büdcəsindən ayrılması nəzərdə tutulan vəsait hesabına istehsalçılara hər hektar əkin sahəsinin və çoxillik əkinlərin becərilməsinə görə, istehsal etdiyi məhsulun növündən asılı olmayaraq, 40 manat məbləğində yardım verilməsi müəyyən edilmişdir. Bundan əlavə, qərarda “Aqrolizinq” ASC və digər hüquqi və fiziki şəxslər tərəfindən kənd təsərrüfatı məhsullarının istehsalçılarına orta hesabla 50 faiz güzəştlə satılacaq mineral gübrələrin miqdarı hər hektar əkin sahəsinə görə 300 kiloqram, onun dəyərinin yuxarı həddi 26 manat müəyyən olunmuşdur. Yardımın ödənilməsinin təmin edilməsi üçün əlaqədar nazirlik və qurumların nümayəndələrinin daxil olduğu müvafiq Respublika Komissiyası yaradılmışdır.
Məruzədə bildirilmişdir ki, dövlət büdcəsinin vəsaiti hesabına istehsalçılara yardım verilməsində əsas meyar kənd təsərrüfatı məhsullarının istehsalı üçün becərilən 1 hektar əkin sahəsi və çoxillik əkinlər götürülür. Yardım veriləcək istehsalçıları müəyyənləşdirmək üçün yerlərdə rayon komissiyaları və onların təqdimatı əsasında kənd ərazi komissiyaları, habelə mütəxəssislərdən ibarət işçi qrupları yaradılmalıdır. Rayon komissiyaları sənədləri qanunvericiliyə müvafiq qaydada tərtib edərək, Respublika Komissiyasına təqdim edir.
Sonra məruzəçi Nazirlər Kabinetinin qərarında qeyd olunan digər məsələlər barədə də iştirakçılara ətraflı məlumat vermiş, sənədlərin tərtibi zamanı meydana çıxan məsələlərin həlli ilə bağlı metodik tövsiyələrini bildirmişdir.
Daha sonra müşavirə iştirakçılarının çoxsaylı suallarına aydınlıq gətirilmişdir. Məhsul istehsalçılarını narahat edən ən vacib məsələlərdən biri mülkiyyət hüququnu təsdiq edən sənədin - torpaq haqqında şəhadətnamənin verilməsinin gecikdirilməsidir. İstehsalçılar lizinqə verilən texnikaların keyfiyyəti ilə bağlı məsələlərə də toxunmuş, məhsulun saxlanılması üçün yerlərdə irihəcmli soyuducuların quraşdırılmasına, anbarların tikilməsinə ehtiyac olduğunu vurğulamışlar.
Seminar-müşavirənin iştirakçıları Prezident Sərəncamının və onun icrası ilə əlaqədar Nazirlər Kabinetinin müvafiq qərarının aqrar bölmənin texnika və gübrələrlə təchizatının yaxşılaşmasında və məhsul istehsalının daha da artmasında mühüm rol oynayacağına əminliyini ifadə etmiş, bu diqqət və qayğıya görə Prezident İlham Əliyevə kənd təsərrüfatı istehsalçıları adından dərin minnətdarlıqlarını bildirmişlər.
Bölmənin digər xəbərləri
