“Kənd təsərrüfatında rəqabətliliyin artırılması” layihəsi çərçivəsində növbəti görüş keçirilib
Bakı, 8 aprel, AZƏRTAC
Dünya Bankının Azərbaycanda həyata keçirdiyi “Kənd təsərrüfatında rəqabətliliyin artırılması” layihəsi çərçivəsində Heyvanların İdentifikasiyası və Qeydiyyat Sisteminin (HİQS) proqram təminatının yaradılması ilə əlaqədar İtaliyanın “AGT S.p.A” şirkəti başda olmaqla, Çexiyanın “Solitea”, Şimali Makedoniyanın “EDUSOFT Limited” və Azərbaycanın “EKVITA Consultants LLC” şirkətlərinin nümayəndələri ilə görüş keçirilib.
Görüşdə iştirak edən Qida Təhlükəsizliyi Agentliyinin sədr müavini Balarəhim Quliyev heyvan xəstəlikləri və qida təhlükəsizliyi ilə əlaqədar beynəlxalq tələblərə uyğun qurulacaq informasiya sistemi, mərkəzləşmiş qaydada heyvan xəstəliklərinə nəzarət və epidemioloji təhlil barədə məlumat verib.
Agentliyin İnformasiya təminatı və innovativ həllər şöbəsindən AZƏRTAC-a verilən məlumata görə, tədbirdə proqram təminatının kənd təsərrüfatı və ərzaq məhsullarının ticarəti zamanı mövcud olan nöqsanların aradan qaldırılması ilə bağlı fikirlər də diqqətə çatdırılıb.
Qeyd edək ki, layihənin məqsədi kənd məhsulları istehsalçılarına sanitariya və fitosanitariya xidmətlərinin təkmilləşdirilməsi, onlara maliyyə xidmətlərinin göstərilməsi, kənd sahibkarlığının və qida sənayesinin inkişaf etdirilməsi və bununla yanaşı, qida təhlükəsizliyi və keyfiyyəti sahəsində tənzimləmə işlərinin daha səmərəli təşkil edilməsidir.
Bölmənin digər xəbərləri
