Könüllülük fəaliyyəti cəmiyyət üçün böyük fayda verir
Bakı, 2 fevral, AZƏRTAC
Könüllülük təmənnasız fəaliyyət növüdür. Həm də elə fəaliyyət növü ki, ona qoşulanlar yaşadığı cəmiyyətə töhfə verir, özünə rahatlıq və dinclik gətirir. Əslində könüllülüyün tarixi XVIII-XIX əsrlərə gedib çıxır. Həmin dövrdə Avropada şəxsi istəyi ilə hərbi xidmətə gedənləri “volantaire”, yəni “könüllü” adlandırırdılar. O vaxt yalnız hərbi sahədə işlədilən bu söz XX əsrdən etibarən, xüsusilə Birinci Dünya müharibəsindən sonra sosial fenomen kimi formalaşmağa başladı.
1881‐ci ildə ABŞ‐da vətəndaş müharibəsi zamanı qadınların könüllü olaraq tibb bacısı kimi fəaliyyət göstərməsi minlərlə könüllünü ətrafında birləşdirən Amerika Qırmızı Xaç Təşkilatının yaranmasına səbəb oldu. Təbii ki, çoxlu belə nümunələr göstərmək olar və bütün bu fəaliyyətlərin əsasında cəmiyyətin hansısa probleminin həllinə dəstək vermək məqsədi dayanır. Bununla yanaşı könüllü olaraq çalışan kəs öz inkişafına dəstək olur, cəmiyyətdə olan müxtəlif və fərqli problemlərin həllində yaxından iştirak edən şəxsə çevrilir. Könüllü fəaliyyət göstərmək çox böyük üstünlüklər verir. Peşəkar təcrübə baxımından insan könüllü fəaliyyət göstərən zaman öz sahəsinin mütəxəssisinə çevrilir və könüllü fəaliyyəti müddətində əldə etdiyi bilik və bacarıqlardan gələcək karyerasında da istifadə edir.
Bunu on ildən çoxdur ki, könüllülük sahəsində fəaliyyət göstərən Dövlət Gömrük Komitəsinin Tibbi Xidmət İdarəsi Elmi-Təcrübi Tədris Mərkəzinin mütəxəssisi Şəhla Mirzəzadə AZƏRTAC-ın müxbiri ilə söhbətində deyib.
Həmsöhbətimiz səhiyyədə könüllülüyün əhəmiyyəti barədə danışarkən bildirib: “Əslində könüllülüyün ən böyük əhəmiyyəti ondan ibarətdir ki, insan həqiqətən özünü cəmiyyət üçün faydalı hiss edir, müəyyən bir təcrübə toplayır və sonrakı fəaliyyətində ondan istifadə edir. Səhiyyədə könüllülük xüsusi əhəmiyyət daşıyır. Sağlamlıq üçün çalışmaq, sağlam gənclik və sağlam gələcək naminə bilik və bacarıqlar əldə etmək və onları ətrafdakılarla bölüşmək xüsusilə mühüm əhəmiyyət kəsb edir. Cansağlığı olmadan hər hansı bir sahədə uğurla fəaliyyət göstərmək mümkünsüzdür, ona görə də sağlam həyat tərzinin təbliği, müxtəlif xəstəliklərdən qorunmaq üçün könüllü çalışmaq, ümumilikdə sağlam cəmiyyətin qurulması üçün prioritet məsələlərdən biridir. Belə olan şəraitdə insan həm özü sağlam həyat tərzi üçün vacib olan qaydaları və sağlamlığı qorumağın yollarını öyrənir, həm də bu işin təbliğatında birbaşa iştirak edir. Nəticədə həm özünə, həm də cəmiyyətə fayda vermiş olur”.
Onun dediyinə görə, adətən könüllü fəaliyyət barədə danışılanda yalnız şəxsi və peşəkar bacarıqların təkmilləşməsi məsələsi xüsusi olaraq qeyd edilir. Lakin könüllülük fəaliyyətinə başqa prizmadan da yanaşmaq olar: “Bu, danılmaz bir faktdır ki, sağlamlıq hər kəs üçün ən vacib və ilkin məsələdir. Səhiyyədə könüllülüyün təbliğ olunmasında ən əsas səbəb budur, çünki könüllülük həm də sağlamlıq vəziyyətinin yaxşılaşmasına gətirib çıxarır. Məsələn, Amerikada aparılan araşdırma könüllülərin könüllü olmayanlardan daha çox həyat zövqünə və daha yüksək sağlamlıq vəziyyətinə sahib olduğu nəticəsini ortaya çıxarıb. Tədqiqat müəyyən edib ki, könüllülük fəaliyyətinə ildə təxminən 100 saat sərf edənlərdə sağlamlıq sahəsində müsbət dəyişikliklər daha çox olub. ABŞ-ın Ekseter Universitetində çalışan alimlərin apardığı digər bir tədqiqatın nəticələrinə görə, könüllülərin stresslə mübarizə aparmaq, sağlamlıq problemlərindən qurtulmaq, daha uzun ömür sürmək və daha xoşbəxt yaşamaq ehtimalı başqalarından daha yüksəkdir. Ümumiyyətlə, aparılan beynəlxalq tədqiqatlar göstərir ki, könüllülər könüllü olmayanlardan daha aşağı ölüm göstəricisinə malikdirlər və gənc yaşda könüllülük fəaliyyəti ilə məşğul olanların sonrakı həyatlarında xəstəliklərə tutulma ehtimalı daha azdır”.
Hazırda ölkəmizdə gənclərin könüllü fəaliyyət göstərməsi üçün yaradılan imkanlar barədə danışan mütəxəssis deyib: “Çox yaxşı haldır ki, ölkəmizdə könüllülüyün təbliği üzrə kifayət qədər uğurlu işlər görülür, dövlət qurumları, özəl sektor və müxtəlif təşkilatlar könüllülüyün təbliği istiqamətində bir sıra layihələr həyata keçirirlər. Ötən il ölkəmizdə Prezident İlham Əliyevin Sərəncamı ilə "Könüllülər ili" elan edilmişdi. Ali Baş Komandanın rəhbərliyi ilə Vətən müharibəsində işğal altında olan torpaqlarımızın erməni hərbi birləşmələrindən təmizlənməsində könüllü iştirak edən, öz qəlbinin səsi, ürəyinin hökmü ilə müqəddəs haqq savaşına qalxan əsgərlərimizin göstərdiyi qəhrəmanlıq və rəşadət nümunəsi könüllülüyün dəyərini daha da yüksəltdi. Bundan başqa ölkəmizdə “Könüllü fəaliyyət haqqında” Qanunun, “Azərbaycan gəncliyi 2017-2021-ci illərdə” Dövlət Proqramının, “2015-2025-ci illərdə Azərbaycan gənclərinin İnkişaf Strategiyası” haqqında Sərəncamın qəbul edilərək icra edilməsi ölkəmizdə könüllülüyün nə qədər geniş əhəmiyyət daşıdığını bir daha sübut edir”.
“Şəxsi təcrübəmdən çıxış edərək deyə bilərəm ki, könüllülük hər bir sahədə insana çox böyük təcrübə və geniş dost auditoriyası qazandırır. Xüsusilə tibbi təhsil alan tələbələrin bu işə qoşulması çox faydalı olardı. Gənclərimizin bu işə qoşulması və özlərini könüllülük fəaliyyətində sınaması əlbəttə ki, həm cəmiyyət, həm də onların özləri üçün müsbət nəticələrə səbəb olar”, - deyə Şəhla Mirzəzadə fikrini yekunlaşdırıb.
Bölmənin digər xəbərləri
