Koordinasiya kimyasında yeni yanaşmalar – elmi konfrans
Bakı, 17 dekabr, AZƏRTAC
Bakı Dövlət Universitetində (BDU) tanınmış kimyaçı-alim, professor Hacalı Nəcəfoğlunun 70 illik yubileyinə həsr olunmuş “Koordinasiya kimyasında yeni yanaşmalar” mövzusunda respublika elmi konfransı işə başlayıb.
Bu barədə AZƏRTAC-a BDU-dan məlumat verilib.
Konfransın açılış mərasimində BDU-nun rektoru Elçin Babayev qeyd edib ki, universitetin tanınmış məzunu, professor Hacalı Nəcəfoğlu ölkəmizdə kimya elminin inkişafına böyük töhfələr verib. 1972-1977-ci illərdə BDU-nun Kimya fakültǝsindǝ təhsil almış Hacalı Nəcəfoğlu Azǝrbaycan Elmlǝr Akademiyasının akademik M. Nağıyev adına Kataliz və Qeyri-üzvi Kimya İnstitutunun (institut indi Elm və Təhsil Nazirliyinin tabeliyindədir – red.) Quruluş kimyası elmi-tədqiqat laboratoriyasında işǝ başlayıb. O, 1983-cü lidǝ namizǝdlik dissertasiyasını müdafiǝ edib. 1985-ci ildǝ BDU-nun Qeyri-üzvi kimya kafedrasında laboratoriya müdiri vəzifəsinə təyin olunub. 1985-1992-ci illərdə BDU-nun Qeyri-üzvü kimya kafedrasında baş laborant, baş mühǝndis, aparıcı elmi işçi və assistent vǝzifǝlǝrindǝ işləyib. 1992-ci ildən qardaş Türkiyədə elmi-pedaqoji fəaliyyətini davam etdirib, 1992-1995-ci illərdə Ərzurum Atatürk Universitetində müǝllim kimi çalışıb. 1995-ci ildən indiyədək isə Türkiyənin Qars Qafqaz Universitetində çalışır.
Rektor qeyd edib ki, professor Hacalı Nəcəfoğlunun rǝhbǝrliyi altında 21 magistr, 11 fǝlsǝfǝ doktoru dissertasiyası müdafiǝ edilib. O, 5 kitabın müǝllifi, 7 kitabın redaktoru, 2 kitabın tǝrcümǝçisi, 230-dan çox elmi mǝqalǝnin müǝllifidir.
Tədbirdə professor Hacalı Nəcəfoğlu haqqında videoçarx nümayiş olunub.
Milli Məclis sədrinin müavini, akademik Rafael Hüseynov, Azərbaycan Dövlət Pedaqoji Universitetinin beynəlxalq əlaqələr üzrə prorektoru professor Mahirə Nağıqızı, Türkiyənin Qəbzə Universitetinin Kimya fakültəsinin dekanı professor Ramazan Altuntaş, Mirzə Uluqbəy adına Özbək Milli Tədqiqat Universitetinin Kimya fakültəsinin dekanı professor Saxnuza Kadirova, Nanoaraşdırmalar elmi-tədqiqat laboratoriyasının baş elmi işçisi professor İmaməddin Əmiraslanov, Atatürk Universitetinin professoru Hasan Seçen, BDU-nun Kristalloqrafiya, mineralogiya və geokimya kafedrasının müdiri Kərim Rəhimov, Qars Qafqaz Universitetinin dosenti Elif Öztürkkan, BDU-nun Kimya fakültəsinin dekanı Fuad Kərimli çıxışlarında professor Hacalı Nəcəfoğlunun Azərbaycanda və Türkiyədə kimya elminin inkişafında, Türk dünyasının elm-təhsil sahəsində şəbəkələşməsində xidmətlərini vurğulayıblar. Çıxışlarda qeyd olunub ki, görkəmli alim yalnız kimya sahəsində deyil, Azərbaycanın mədəniyyəti, dili, ədəbiyyatı, ümummilli mövzularla bağlı çoxsaylı yazıları, çıxışları ilə daim ölkəmizin həqiqətlərini tanıdıb, vətəndaş kimi öz borcunu layiqincə yerinə yetirib.
Sonra professor Hacalı Nəcəfoğlunun yubileyi ilə bağlı müxtəlif ölkələrdən olan alimlərin videotəbrikləri səsləndirilib.
Professor Hacalı Nəcəfoğlu konfransın yüksək səviyyədə təşkilinə və elmi-pedaqoji fəaliyyətinə verilən dəyərə görə təşəkkürünü bildirib, BDU-nun təhsil və iş həyatında xüsusi yerinin olduğunu, daim Azərbaycana xidmət etməkdən qürur duyduğunu bildirib: “Həyatda ilk xoşbəxtliyim BDU-ya daxil olanda olub. Burada keçirdiyim hər an, imtahanlar zamanı aldığım qiymətlər, məzun olmağım və sonra burada işə başlamağım - hamısı mənim üçün qiymətlidir”.
Konfrans işini bölmə iclasları ilə davam etdirib.
Bölmənin digər xəbərləri
