KOREYALI GƏNCLƏR LƏNKƏRAN VƏ LERİK RAYONLARINDA OLMUŞLAR
AZƏRTAC-ın müxbiri xəbər verir ki, Prezident İlham Əliyevin Sərəncamı ilə təsdiq edilmiş Azərbaycan Respublikasının Gənclər və İdman Nazirliyi və Koreya Respublikası Milli Gənclər Komissiyası arasında gənclər sahəsində əməkdaşlıq haqqında anlaşma memorandumuna uyğun olaraq, koreyalı gənclərdən ibarət ilk nümayəndə heyəti Azərbaycana səfəri çərçivəsində Lənkəran və Lerik rayonlarında da olmuşlar.
Lənkəran Şəhər İcra Hakimiyyətinin başçısı Süleyman Mikayılov koreyalı gənclərlə görüşdə rayonun iqtisadi və turizm imkanları barədə məlumat vermiş, Cənubi Koreya şirkətlərinin Lənkəranda turizmin inkişafını dəstəkləməkdə maraqlı olduğunu vurğulamışdır.
Rayonda dövlət işlərində gənclərə üstünlük verildiyini xatırladan icra hakimiyyətinin başçısı, gənclərin asudə vaxtlarının səmərəli təşkilinə də diqqət yetirildiyini bildirmişdir.
Görüşün sonunda qonaqlara xatirə hədiyyələri təqdim edilmişdir.
Nümayəndə heyətinin üzvləri Lənkəran tarix-diyarşünaslıq muzeyində, XVII əsrin yadigarı olan “Lənkəran mayakı”nda və iki dəfə Sovet İttifaqı Qəhrəmanı, tank qoşunları general-mayoru Həzi Aslanovun ev muzeyində də olmuşlar.
Sonra Lerikə səfər edən koreyalı gənclərə bu dağ rayonu barədə məlumat verilmişdir. Qonaqlar tarix-diyarşünaslıq muzeyində, üzunömürlülər muzeyində və ötən əsrdə planetin ən uzunömürlü sakini sayılan Şirəli Müslümovun ev muzeyində olmuşlar.
Bölmənin digər xəbərləri
